Footer

Pundo ti OWWA, natagamtamen?

Inaramat manen ti Malakaniang ti Executive Order 464 tapno maliklikan dagiti kameng ti Gabinetena ken dadduma a nangangato nga opisial ti turay ti dumatag iti hearing nga inangay ti Senado itay Hulio 31 babaen ti komite da Senador Jinggoy Estrada ken Richard Gordon.

Saan a nagparang da Labor Secretary Arturo Brion, Budget Secretary Rolando Andaya, Jr., Foreign Undersecretary Esteban Conejos Jr., Philippine Overseas Employment Administrator Rosalinda Baldoz, Overseas Workers Welfare Administrator Marianito Roque, ken Ambassador iti Israel Antonio Modena iti daytoy a hearing ngem nangayabda ketdi iti press conference a nangikalintegan ni Executive Secretary Eduardo Ermita a makumikom unay dagiti opisial para iti nasayud a pannakaibakuit dagiti kadaraantayo manipud iti gubat iti Israel ken Hezbollah guerrillas (iti Lebanon), ket saan a daytoy ti umisu a panawen tapno makuestionaran ti pundo ken wagas ti pannakaibakuitda ken awan ti makitada a maisagsagana a lehislasion mainaig iti nakapaayaban dagiti opisial ti turay.

Ngem di man annugoten dagitoy nga opisial, uray ordinario nga umili, makitana a pinawilan ti Malakaniang ida a dumatag iti sanguanan dagiti senador tapno malawlawagan ti pudno a kasasaad ti pundo ti OWWA nangruna ita a kasapulan unay dagiti kailiantayo a naipit iti gubat iti Lebanon ti pannaranay manipud iti gobierno.

Saan ngarud a malapdan a sumngay iti panunot: adda kadi ilemlemmeng ti turay wenno ti OWWA tapno liklikanda ti sumarang iti nasao a hearing?

Mangted tunggal OFW iti kontribusion a $25 no mapanda mangged iti ganggannaet a pagilian. Sangkaisawang ti OWWA nga adda nakasagana nga P8 bilion a pundo a maaramat para kadagiti kadaraantayo no adda problemada wenno iti tiempo ti kalamidad wenno gubat iti pagtrabahuanda a pagilian.

Saan koma a naituon ita ti imatang dagiti umili iti kontrobersia ti pundo nga adda iti ikut ti OWWA a nagtaud manipud iti naurnong a kontribusion dagiti kadaraantayo a mapan agtrabaho iti sabali a pagilian no saan a nagpaarayat ni Ambassador iti Lebanon Al Francis Bichara a makiraudanen ti pundo ti embahada nga imatonanna idinto a linagidawna ti kaawan ti impatulod ti OWWA a kuarta para iti pannakatulong dagiti kadaraantayo iti evacuation center ken iti pannakaibakuitda.

Pinaglibakan ni OWWA administrator Marianito Roque ti impalgak ni Bichara nga awan ti saranay a simmangpet iti embahada. Kinunana a nangipatulod ti ahensia iti kuarta a maaramat para iti pannakaibakuit dagiti kailiantayo.

Impakaammo pay ni OWWA trustee Estrelita Hizon a rinuk-atanen ti ahensiana ti $2 milion, malaksid ti $2 milion nga immun-una a pinalubosanna.

Ngem naammuan manipud ken ni Senador Joker Arroyo a $20,000 laeng ti impatulod ti OWWA, saan nga iti embahada iti Lebanon, no di iti welfare office ti OWWA iti Beirut.

No apay nga iti OWWA officer ti nakaipatulodan ti kuarta, a saan ketdi a ti embahada a nagkiddaw, ti narigat a maawatan.

Kinuna pay ni Sen. Arroyo nga inotorisaran ti Department of Foreign Affairs ti embahada itay Hulio 14 a mangiruar iti $50,000 manipud iti 2006 budget ti embahada para iti operasionna a maaramat para iti pannakaibakuit dagiti kailiantayo. Sabali pay ti inruar ti embahada a $25,000 manipud iti pundona.

Iti sabali a bangir, nakagasto ti embahada iti $107,151.54 iti panangibakuitna kadagiti kadaraantayo iti walo a grupo (batches) babaen ti panagluganda iti bus manipud iti Beirut agingga iti Damascus iti Syria. Adda pay $32 a binayadan ti embahada para bisa ti tunggal evacuee iti gobierno ti Syria.

Kuna ni Sen. Arroyo a saan pay a sinulnitan ti DFA ti $107,151.54 a nakaud ti embahada iti pundona para iti operasionna iti 2006.

Di ngarud mababalaw ni Bichara iti panagpaarayatna ta makiraudanen ti pundo ti embahada idinto nga awan pay ti saranay manipud iti OWWA iti laksid ti waragawag daytoy nga addan impatulodna a kuarta para iti pannakaibakuit dagiti kakailiantayo a naipit iti gubat iti Lebanon.

Ti saludsod: asino ti agsasao iti pudno?

No pudno nga adda pundo ti OWWA, apay a masagsaginnit dagiti napagawid a kakailiantayo? Maiduma unay kadagiti sabali a pagilian nga idi bumtak ti hostilidad iti nagbaetan ti Lebanon ken Israel nangarkiladan kadagiti bus, bapor, eroplano para iti madagdagus nga evacuation dagiti nasionalidadda.

No awan ti ilemlemmengda, apay a di pinalubosan ti turay dagiti opisial dagiti maseknan nga opisina a sumaklang iti hearing iti Senado a dida ketdi agtaklin iti likudan ti Executive Order No. 464?

Nupay mamatikami a saan a daytoy ti umno a tiempo, rumbeng laeng nga ipalgak ti OWWA ti pudpudno a kasasaad ti pundona a nagtaud kadagiti OFWs a madadaan koma a maaramat iti tiempo a kasapulanda ti saranay ken tulong.

Ngem iti sanguanan ti di makapnek a wagas a pannakaibakuit dagiti kadaraantayo, ken iti panangipawil ti Malakaniang nga agpalawag dagiti maseknan nga opisial iti sanguanan ti Senado, sumuknor laeng ti atap a natagamtamen ti pundo ti OWWA iti baet ti panangibambando dagiti opisialna a di nakutkuti ti binilion a pundona.

Daytoy ti kasapulan nga ilawlawag ti OWWA iti kabiitan a panawen!

Comments are closed.