Footer

Dawat ti OFW kadagiti agtuturay: ‘tulongandakami a tumakder manen’

CANDON CITY, Ilocos Sur – Nagpakpakaasi ti maysa nga overseas Filipino worker a lumugar ditoy a napagawid iti pagilian maigapu iti panagbettak ti hostilidad iti nagbaetan ti Israel ken Hezbollah gerilias ti Lebanon iti gobierno probinsial iti panangipaayda iti tulong pinansial kadakuada a biktima ti gubat.

Dinawat ni Grace Lazarte, 32, residente ti Tamurong 1st, ditoy a siudad, a tulongan koma ida dagiti agtuturay ti siudad ken ti gobierno probinsial tapno baliwanda ti tumakder kalpasan ti dakes a napagtengda iti Lebanon a nagtrabahuanda.

Karaman ni Lazarte iti umuna a grupo dagiti evacuees manipud iti Lebanon ket simmangpet ditoy pagilian idi Hulio 23.

Maysa ni Lazarte kadagiti OFWs a runaway gapu ta nakatumpong iti abusado nga amo. (Basaen ti naiserye a salaysay a mangrugi iti daytoy nga isyo. – Ed)

“Saanko la nga ibaga daytoy para iti bagik… para iti amin metten a kakaduak a naggapu iti Lebanon,” kinuna ni Lazarte idinto nga innayonna a kaadduanna kadakuada ti immutang nga adda interesna a dakkel para iti placement fee ken dadduma pay a nagasto iti panagaplayda nga agtrabaho iti Lebanon.

“Ti dawatko laeng, (sana) tulongandakami koma ti munisipio wenno ti gobiernotayo a tumakder manen,” kinuna ni Lazarte.

Kinunana nga awatenna uray “ipabulod laeng ti gobierno, wenno tulong nga utangenmi a pangirugi iti bassit a negosio tapno makatakderkami met laeng.”

Kinunana a P50,000 ti nabusbosna iti panagaplayna a mapan Lebanon a kaadduanna ti inutangna.

Impalgakna nga agsublisubli dagiti nakautanganna ngem awan pay ti maitedna gapu iti napasaranna iti Lebanon.

Naammuan ken ni Lazarte a sakbay a nagabrod, adda iti buy-and-sell ti segunda mano a lugan ken agpapaay iti maysa a lending corporation.

“Ngem seasonal laeng daytoy ken saan a kanayon nga adda matgedan,” kinunana.

Kinuna ni Lazarte a problemana ti napanawanna a kontrata amangan no isut pakaidarumanna.

Ngem kinunana nga impatalged ni Bokal Robert Tudayan nga awan pagdanaganna ta addan pammilin ni Pres. Arroyo a maibakuit amin a Filipino nga agtrabtrabaho iti Lebanon gapu iti kumarkaro a gubat iti dayta a pagilian.