Footer

Drug personality, natiliw iti buy-bust operation

NARVACAN, Ilocos Sur – Kas paset ti nainget a kampaniada a maparmek ti panagraira ti droga ditoy, maysa manen a drug personality ti tiniliw dagiti pannakabagi ti linteg ti daytoy nga ili nga idadauluan ni PCI Marlo Castillo, Chief of Police, ken dagiti pannakabagi ti PDEA-PRO1.

Nakemmeg ni Erwin Cabana, 20, agnaed iti barangay San Jose ditoy babaen iti buy-bust operation nga insayangkat dagiti pannakabagi ti linteg kenkuana iti Amigos Videoke Bar, iti barangay Santa Lucia, daytoy nga ili.

Naala manipud kenkuana ti maysa a heat-sealed a plastic sachet a naglaon iti mapapati a shabu nga agdagsen iti .1 gramo, ken P500 a marked money nga addaan iti serial number QY-278883 ken ‘DB’.

Daytoyen ti maikalima nga operasion dagiti pannakabagi ti linteg ti Narvacan iti babaen ni Major Castillo kas hepe ti pulisia ditoy.

Maipalagip nga iti nagkauna nga interbiu ken ni Castillo, kinunana a ti panakapugipog ti maiparparit nga agas ti maysa a kangrunaan nga ikkanna iti importansia, kas mandar kenkuana ni Mayor Edgar Zaragoza.

Kabayatanna, tallo a pannakabagi ti linteg ti naisaang iti napudot a danum gapu iti mapapati a panangkabilda iti maysa a sibilian iti Amigos Videoke Bar ditoy.

Nabigbig ti biktima a ni Rolando Banan, residente ti Lubong, Santa Maria, Ilocos Sur idinto a dagiti masuspetsa ket mapapati a da PO3 Virgilio Cacho, PO3 Jesus Arizabal, PO2 Billy Parfali, agpapada a kameng ti 104th PPMG a nakabase iti Paratong, iti daytoy met laeng nga ili.

Iti inisial nga imbestigasion, naammuan a saan a nagkikinnaawatan ti biktima ken dagiti masuspetsa bayat ti kaaddada iti nasao a videoke bar a nagtungpal iti pannakakabil ti biktima.

Naammuan ken ni Col. Dayag, group director ti 104th PPMG a gapu iti inaramidda, naidestinon dagiti nasao a pulis iti Cervantes PNP.

Comments are closed.