Footer

Gobierno prob’l, mangted tulong pinansial kadagiti OFWs a biktima ti gubat iti Lebanon

VIGAN CITY – Imbilin ni Gov. Luis “Chavit” Singson ti pannakaited iti tulong a pinansial kadagiti overseas Filipino workers a taga-Ilocos Sur a kaadduanna ti domestic helpers a napagawid iti pagilian manipud iti Lebanon gapu iti panagbettak ti gubat iti nagbaetan ti Israel ken Hezbollah militia.

Kinuna ni Bokal Jeremias “Jerry” Singson a saklawen ti pammilin ti gobernador dagiti biktima ti gubat iti Lebanon, aglalo dagiti naglak-am iti pannakaabuso manipud kadagiti amoda.

Iti sessionda itay Agosto 8, inaprobaran ti sangguniang panlalawigan a ni Bokal Singson ti nagpaay a presiding officer ti resolusion nga indatag ni Bokal Robert Tudayan a nangkiddawanna iti pannakaited iti pinansial a tulong kadagiti 4 nga OFWs iti segundo distrito a nagsagrap iti pannakaabuso manipud kadagiti amoda iti Lebanon.

“Kayatko a maammuan ti intero nga Ilocos Sur ti sinagrap da Sonia Andaya, Grace Lazarte, Revelyn dela Rosa, ken Blessie Velasco,” kinuna ni Tudayan sana imbinsabinsa dagiti sinagaba dagiti uppat nga OFWs iti ima dagiti amoda a Lebanese.

Ngem insingasing ni Bokal Ronnie Rapanut a kasapulan a maammuan ti bilang dagiti taga-Ilocos Sur a naibakuit manipud iti Lebanon tapno madetermina ti maited a gatad kadakuada.

Addan nakumpirma a 14 nga OFWs a taga-Ilocos Sur a napagawid manipud iti Lebanon. Mapattapatta nga umadu pay ti bilangda gapu iti pammilin ni Pres. Arroyo a maibakuit amin a Pilipino nga agtrabtrabaho iti Lebanon gapu iti kumarkaro a gubat iti dayta a pagilian.

Kinuna ni Bokal Singson a dependento iti pagtutungtongan no agpapada ti tulong pinansial a maited kadagiti naggawid ditoy probinsia nga OFWs.

“Adda dagiti OFWs a nasayaat ti nagsaadanda (iti Lebanon). Adda met dagiti madi ti nagsaadanda… biktimada la ngaruden iti gubat, biktimada pay iti maltreatment,” kinuna ti bokal idinto nga innayonna a “double murder” ti napasamak kadagitoy.

Kinunana ti bokal a nupay awan pay ti eksakto a gatad a maited kadagiti OFWs a biktima ti gubat, “definitely, tumulongtayo kadagiti kakabsatttayo a biktima ti gubat iti Lebanon.”