Footer

Nagpammarang a kustomer, intarayna 2 tagilako a selpon

VIGAN CITY – Dua a nangina a selpon ti intaray ti maysa a lalaki a nagpammarang a kustomer iti maysa a pagtagilakuan ditoy itay lawasna.

Nagreport iti polis ni Mao Chan, 25, baro, akinkukua iti Rud's Dry Goods a masarakan iti Sikatuna Street, Barangay I, nga intaray ti maysa a lalaki a nagpammarang a kustomer ti lakona a dua a selpon nga agpateg iti nasurok a P50,000.00.

Segun ken ni Chan, dinissaagan ti suspetsa ti agan-andar a motorsiklona, simrek iti pagtagilakuan ket nagpairuar iti gatangenna a Nokia N80 ken Nokia N70.

Agpateg ti Nokia N80 iti P31,000 idinto a P20,000 ti N70.

Kinuna ni Chan nga apaman a nairuarna dagiti selpon, pinidut ti lalaki sa dagus a rimmuar iti pagtagilakuan, sinakayanna ti agan-andar a luganna sa naglibas iti daya a direksion.

Sinapul dagiti nagresponde a polis ti suspetsa ngem saandan a nabirokan.

Comments are closed.