Footer

Sinagrap dagiti OFWs a pannakaabuso: sugat iti kaunggan a narigat nga aglunit

NO ADDA man dagiti nasayaat nga amo a Lebanese, adda met dagiti saan a nasayaat ti panangtratoda kadagiti domestic helper a Filipina nga agpapaay iti pagtaenganda.

Daytoy ti naarisit manipud kadagiti overseas Filipino workers a nagbakuit gapu iti gubat iti nagbaetan ti Israel ken Hezbollah gerilia ti Lebanon. Karaman dagiti nagbakuit nga OFWs dagiti sumagmamano a taga-Ilocos Sur.

Itay lawasna, imbilin ni Pres. Arroyo ti pannakaiwayat ti mandatory a panagbakuit amin a Filipino a naipit iti gubat iti Lebanon tapno aggawiddan iti Pilipinas.

Iti panagawid dagiti kailiantayo nga OFWs, adu ti imetda a nagduduma a padas a nasayaat ken dakes a sinagrapda iti ima dagiti amoda.

Segun ken ni Manang Lourdes Barroga ti Barangay Paratong, Vigan City, nasayaat ti amo dagiti annakna, da Marites, Elizabeth ken Eloida. Karaman dagiti tallo nga annak ni Manang Lourdes ken ti manugangna, iti second batch dagiti evacuees a simmangpet iti pagilian itay nabiit.

“Nalaing met ti amoda…,” kinuna ni Manang Lourdes idinto nga innayonna nga inikkan pay ti amoda dagiti annakna iti balonda idi agpaing dagitoy iti evacuation center.

Naammuan ken ni Manang Lourdes a sakbay a nagbakuit iti France ti amo a babai dagiti annakna, inikkanna iti kuarta ken tiket dagiti annakna.

Kinuna met ni Elizabeth iti pannakiinnuman kenkuana ni Jun Ramos ti DWRS nga okay met ti amoda ket kayatna pay nga agsublida nga agserbi kadakuada, ngem saandan a kayat nga agkakabsat.

Maymaysa ti amo a pagserserbian da Elizabeth ken ti sabali pay a kabsatda nga adda iti France.

Kinuna ni Elizabeth a kayat ti amoda nga alaen ida idi agbakuitda iti France ngem dida nakasurot gapu iti problema ti bisa.

Kinuna ni Manang Lourdes, a no isu ti mapaturay, dinan kayat nga agsubli pay dagiti annakna nga agtrabaho iti ballasiw-taaw.

“Mangankam la ket iti inaldaw, umdasen kaniak,” kinuna ni Manang Lourdes.

Impalgak ni Manang Lourdes nga iti kaadda dagiti annakna iti Lebanon, no mabalin, dina kayat a buyaen ti gubat iti nasao a pagilian ta kasla agkupit ti barukongna isu a kanayon a mapan agkararag iti Simbaan a Bassit.

“Saak la nakagin-awa idi makitak ida (dagiti annakna) iti airport,” kinuna ni Manang Lourdes.

Uray ni Wilma Castañeda, domestic helper a karaman iti umuna a grupo dagiti evacuees, kinunana a nupay nasayaat ti amona, dinan kayat ti agsubli pay iti Lebanon agsipud ta dina magustuan ti panangtratar dagiti sabali a Lebanese kadagiti domestic helperda.

Impalgakna a nakitkitana ti panangab-abuso ti maysa nga amo a Lebanese iti maysa a Pinay a padana a DH.

“Daydiay maysa a kaarrubami, kabkabilen ti amona. Aglitlitem ti rupana,” kinuna ni Castañeda.

Kinuna pay ni Castañeda a saanda a makapagpapatang a Filipina ta iparit ti amoda. Makapagsasaritada laeng babaen ti senias tapno di mangngeg ida ti amoda.

“Nainget ti patakaranda, dida kayat ti agparuar no day-off. Dina ited ti sueldo,” kinuna ni Castañeda.

Kinunana a di impaiggem ti amona ti sueldona iti dua a tawen amangan no aglibas met a kas dagiti dadduma a kailianna. Nupay kasta, inted ti amona ti sueldona idi nagpakada nga aggawid iti Pilipinas.

“Diak kayaten ti agsubli (iti Lebanon) ta diak magustuan ti panangtratar dagiti amo iti katulongda,” kinuna ni Castañeda.

Ngem impalgakna a kayatna pay ti agabroad ta agpagpagadal pay.

[ Adda tuloyna ]

Comments are closed.