Footer

2 babbalasitang, narames, namolestia

SANTA LUCIA, Ilocos Sur – Dua a balasitang ti nagpulong iti polis a narames ken namolestiada iti maysa nga balay-paginaan iti Candon City itay lawasna.

Intudo da Lina, 15, ken Mely, 16 (saan a pudno a naganda), agpada nga agnaed iti barangay Paoc Norte, ditoy ti nangabuso kadakuada a ni Victor Tejada, agnaed iti Barangay Namatican iti daytoy met laeng nga ili.

Naammuan iti imbestigasion a magmagna dagiti dua a biktima iti alas nuebe ti rabii iti barangay road iti Namatican idi sinardengan ida ti suspetsa a nakalugan iti motorsiklo a Honda TMX ket indiayana ti panagluganda. Idi nagkedked dagiti biktima, imbalangan ti suspek ti luganna ket pinilitna ida nga inlugan.

Idi makalas-udda iti highway, imbaga dagiti dua a dumsaagdan ngem indiretso ketdi ti suspek ti lugan iti Candon. Iti apaglabes iti arko ti Candon, dandanida naaksidente a puon ti nakapilayan ni Mely.

Segun dagiti biktima, intarus ti suspek ida iti dua a kuarto iti maysa a pasdek-paginaan ket ditoy a mapapati a rinamesna ni Lina ken minolestiana ni Mely.

Kinuna dagiti biktima a binutbuteng ida ti suspek gapuna a dida insigida nga impulong ti napasamak kadakuada.
Ngem pinaglibakan ti suspek ti akusasion dagiti biktima idinto a kinunana nga adda laeng iti pagtaenganda iti tiempo a kuna dagiti biktima a pannakarames ken pannakamolestiada ken amangan no inaramatda laeng ti naganna. (Danny Antalan)