Footer

Agassawa a negosiante, nasaneb, P.5-M, intaray dagiti mannanakaw

STA. CRUZ, Ilocos Sur – Tallo nga armado a lallaki ti nanghold-ap iti agassawa a negosiante iti maysa a barangay ditoy itay lawasna ket intarayda dagiti kuarta, alahas ken napapateg a lako dagitoy.

Nagpulong da Vincent Bumanta ken ti asawana, ni Lani, residente iti Poblacion Este, ditoy iti polis para iti pannakatiliw dagiti suspetsa.

Iti panagimbestiga dagiti polis, naammuan nga agturong koma dagiti biktima iti tiendaan publiko a naglugan iti motorsiklo. Idi agdaldaliasatda iti Paredes Street, kellaat a linabsan dagiti suspetsa a naglugan iti motorsiklo sada binalanganan ti dalan dagiti agassawa.

Pinaturongan dagiti suspetsa iti paltog dagiti biktima, indeklarada ti hold-ap, sada kinasakas ti shoulder bag ken travelling bag nga imet dagiti agassawa.

Segun dagiti biktima, naglaon dagiti bag iti P300,000 a kuarta, alahas nga agpateg iti P20,000, dua a personal checks nga agdagup iti P86,000, bankbook, ATM card, selpon ken prepaid cards nga agpateg iti P80,000.

Mapapati a nakaarmas dagiti suspetsa iti cal. 38.

Naglibas dagiti di pay am-ammo a suspetsa iti direksion ti kalsada nasional.

Comments are closed.