Footer

Agindeg iti Banayoyo, naalarma iti rabies

BANAYOYO, Ilocos Sur – Maigapu iti pannakatay ti dua a kabarangayanda kalpasan a nakagatda iti addaan rabies nga aso, naalarma dagiti agindeg iti sitio Puspos, barangay Poblacion Norte iti daytoy nga ili.

Naammuan ken ni Mayor Elena Sorio nga agdagupen iti 22 a residente ditoy ti kinuyogna iti Southern Ilocos Sur District Hospital tapno agpabakunada iti anti-rabies vaccine gapu iti amakda a naapektaranda iti nasao a virus.

Kinumpirma ni Dr. Genevive Digay, RHU doctor iti daytoy nga ili, a nakagat iti aso dagiti dua a natay.

Saan a nainaganan dagiti biktima a maysa a barito ken maysa a baket.

Naammuan ken ni Digay a kabayatan laeng ti panagsakit dagiti dua a nadlawan ti barangay health worker a nakagat dagitoy iti aso. Iti ipapatay dagitoy, naalarma dagiti kalugaranda iti amakda a naakaranda.

Naammuan ti DZTP ken Tawid News Magasin a malaksid kadagiti dua a natay, uppat pay a sabsabali a tattao ti nakagat ti aso idinto a tallo met ti nakagat ti aso a kinagat ti aso nga addaan iti rabies.

Saan a naobserbaran ti adda rabiesna nga aso ta nakalibas daytoy ken mapapati a pinarti dagiti agnaed iti kabangibang a barangay.