Footer

Agingga a di agbalbaliw dagiti politiko

KAS NINAMNAMA, saan manen a dimmur-as ti impeachment complaint iti labes ti Kamara.

Nabatad dagiti pagilasinan. Idi rugian dagiti kameng ti oposision ken nadumaduma a sektor nga ipila dagiti impeachment complaints, imbataden dagiti kaaliado ni Pres. Arroyo nga awan ti pagtungtungpalanna.

Kunada nga isu met laeng nga isu dagiti indatag dagiti pro-impeachment a mapapati a naglabsingan ti Presidente ket awan ti banagenna no di kettelendan iti puon tapno maikupinen ket maibaw-ing ti imatangda nga opisial kadagiti kangrunaan a problema a sangsanguen ti pagilian.

Uray ni House Speaker Jose de Venecia, imbatadnan a saan nga agdur-as ti impeachment complaint idinto ta impaganetgetna nga ad-adda nga ipaayanda iti imatang dagiti prioridad a gakat a mangidur-as kadagiti programa ti agdama nga administrasion.

Kastoy ibagbaga ti Malakaniang: lipatenen dagiti di panagkikinnaawatan ket agtitimpuyog koma amin a mangtulong ken ni Pres. Arroyo para iti pannakairubbuat iti nadurdur-as nga ekonomia ti pagilian.

Iti met panirigan dagiti agpalpaliiw, sinursurot manen dagiti kaaliado ti Presidente ti script a panangkettel iti impeachment complaint idi napalabas a tawen.

Madakamat ditoy a ti immuna nga impeachment complaint nga indatag ni Abogado Oliver Lozano ti binigbig ti komite ti justice a kuna dagiti legal nga autoridad nga adayo nga amang a nakapkapsut ngem dagiti indatag dagiti kameng ti oposision.

Kas ammon ti kaadduan, imbasura ti komite ti justice ti nasao a complaint.

Iti daytoy kabaruan a complaint maikontra ken ni Pres. Arroyo, saan a binigbig ti committee on justice dagiti pito nga immuna a complaint a naidatag agsipud ta saklawda pay laeng iti one-year ban ti impeachment idi maipila dagiti nasao a complaint.

Ti laeng maikawalo nga impeachment complaint nga indatag ti Black and White Movement ti binigbig ti komite.

Madakamat ditoy a buklen ti Black and White Movement dagiti dati a kameng ti Gabinete ni Presidente Arroyo a naglusulos idi kabara ti isyo ti mapapati a panagsuitik iti eleksion maikontra ken ni Pres. Arroyo sada indagadag ti panaglusulos daytoy.

Impetteng ni Pres. Arroyo nga isu ti nangabak iti eleksion ket imbatadna a saan nga aglusulos iti takemna.

Nasarkedan ti Presidente dagitoy a krisis ti lideratona ket makita a nataltalged itan iti puestona no maikompara idi napan a tawen.

Inkeddeng ti committee on justice itay lawasna a supisiente ti porma ti com-plaint. Ngem kas ninamnama, saan a nakalusot ti complaint iti babaen ti anag wenno substance.

Iti panagibasurada iti complaint, naminsan pay a pinaneknekan dagiti kaaliado ni Pres. Arroyo nga uray kasano a panagpakaasi, panagunnoy, ken panangiyanek-ek dagiti kameng ti oposision a maluktan ken mabukitkit dagiti ebidensiada, nagtungpalda laeng nga awan ti nagbambanaganna ta naikeddengen dagiti kaaliado ti Presidente a makettel ti impeachment complaint iti kabiitan a tiempo.

Maarisit daytoy iti balikas ni ni House Majority Leader Prospero C. Nograles, a nagkunaanna nga iwalin ti liderato ti Kamara iti sumagmamano nga aldaw ti kaudian nga impeachment complaint maikontra ken ni Pres. Arroyo ta ituon laengen dagiti agilinlinteg ti imatangda kadagiti prioridad a gakat iti Kamara.

Ken ni Dip. Mauricio Domogan, agturong iti kanibusanan ti impeachment complaint agsipud ta awanan iti umdas a bilang dagiti minoridad a mangiduron iti impeachment complaint. Iti sabali a pannao, maysa a numbers game ti impeachment a dakkel a pakaatiwan ti oposision.

Sumangkautro, nagsubli dagiti diputado a simmurot iti tignay a mang-impeach ken ni Pres. Arroyo idi napan a tawen iti sidong ni Speaker De Venecia.

Political survival a kuna.

Rason dagitoy: maipalikud koman ti impeachment tapno nawaywaya ti gobierno a mangtulong kadagiti kadaraan a naipit iti gubat iti Lebanon, kasta met nga isardengdan ti dida panagsisinnurot iti politika ket agtrabahoda nga agmaymaysa tapno maisalakan ti pagilian manipud iti “kuko ti kaawan-bael ken kaawan-namnama.”

Maarisit ditoy no kasano ti panagut-utek dagiti agilinlintegtayo.

Ditayo ngarud mababalaw dagiti obispo idi imbatadda a saanda a pabor iti pannakaidatag manen ti impeachment complaint maikontra ken ni Pres. Arroyo ta awan pagbambanaganna a tignay.

Kadagiti obispo, agingga a ti proseso ti impeachment ken dagiti paglinteganna, kasta met ti pampanunot dagiti amin a makipartisipar a partido, kontra wenno pabor, ket akayen ti di pudpudno a motibo ken pannakipagrikna iti pagsayaatan ti amin, agbalin laeng ti impeachment a saan a produktibo nga ehersisio ken pataudenna laeng ti umun-uneg a negatibo a panagkita dagiti umili kadagiti politiko.