Footer

Balo wenno ni Baro (Umuna a paset)

EMCEE:

Adda dua nga agar-arem ken ni ading balasang
Maysa a baro ngem adda met ugalina a nakersang:
Nakaguapguapo nga agpayso, isu nga agrurutap ti tsiksna
Kuna pay dagiti dadduma ket nakasadsadut man dayta
No isu ti pagtinnagam inumento laeng ti luam
Nasaysayat laengen nga agbaakka no isu ti pakiasawaam

Ti maysa pay nga agar-arem ket balo
Nasingpet ken nagaget a tao awanan iti bisio
Nupay gagangay laeng ken inun-una ngem ti balasang
Ngem age doesn’t matter kano kuna ni Nana Ansang
Dua ti tisiking ti balo ngem immalada met iti ama
Isu a makamaymayaten ni balasang a mangsungbat kenkuana
Ngem no makitana ni baro ket agbaliw pangngeddengna
Ta kasla ketdi kimpet iti baro ti pusona

Ti balasang itan ne, isun tay agpampanunot
Ad-adalenna ita a, ti bagina no ania ti masurot
Talaga a mariribukanen aramidna di payen agsusurot
Ta talaga met a narigat a desisionan ti kastoy a parikut
Ta no nakapuyka nga agamiris ket sikanto iti udina agbabawi
Isu a nasken la unay ti panangtingiting iti panagpili
Ta ti panagasawa saan a kas iti kalluto nga innapuy a yula
No marikna ti pudotna ken no masinit dayta dila

Daytoy ngarud ti tema nga inda pagsalisalan
Dagiti bumubukanegan iti ili ti Tubao a kapintasan
Isu a patgek a tallaong agulimekkayon
Ta ipasakon ti mikropono iti agrebbeng a mangtimon

DAGITI AGBIBIAG:
Mangiturturong
Prinsesa ti Bukanegan
Prinsepe ti Bukanegan

MUSIC: Ilocano song

MANGITURTURONG:

Gagayyem ken kakabsat, ammak ken innak ida
Dakayo nga ub-ubbing ken dagiti kabataan dita
Naimbag nga orasyo amin a sangapada
Adtoy ti bukanegan ti ilitayo a Tubao naipangruna

Ta biagenna ti aw-awid ni Ilokano ken dadduma pay a kultura
Ti bukanegan ket pagraragsakan idi dagiti appo ken amma
Tunggal dumteng iti matagtagiuray a panagpipiesta

Isu ngarud a nasayaat la unay
Ti panagisubli dagitoy a saguday
Tapno dagiti kabataan inda ipateg pay
Ti pulida ken nakaiyanakanda a daga nga awanan saway

Siak ni (nagan) ti napusgan a mangiturong
Iti daytoy naipangpangruna a tallaong
Ti pagsusikan dagiti bumubukanegan
Ket maipapan iti balasang a mariribukan

Dua dagiti napasnek nga agar-arem kenkuana
Maysa a nataer a baro ngem adda madi nga ugalina
Idinto ta ti maysa ket balo a kabambanuaganna
Ngem nagaget ken nasingpet nga awan ti bisiona

Ni ading balasang mariribukan
Isu ngarud daytoy ti akem ti bukanegan
Masolbar ti parikut ti asinoman
Babaen kadagiti maidatag a kapanunotan
Ti prinsipe ken prinsesa iti bukanegan

Ti mangirupir a ti rumbeng a pilienna
Ti balasang nga agprobproblema
Ket ti baro a nakaguguapo
Ta maibagay kenkuana a saan ket a ti balo
Ta ti tao ket di agnanayon a loko
Ta saan a kasta ti natural ti tao
Dumtengto met ti panagbalbaliwna kano
Lalo no daytoy ket addanto ti ubbana a guapo
Wenno addanto ti bebina aw-awirenna a nalungpo

[ Adda tuloyna ]