Footer

Fr. Advincula: kinarigat ti panagbiag ti saan a pagawidan dagiti OFWs

KINUNA ni Fr. Agustin Advincula a mabalin nga umabot laeng iti 10,000 dagiti kadaraantayo nga agawid iti Filipinas idinto nga agbati la ketdi ti ad-adu a bilang ta ituloyda ti mangged iti Lebanon.

Impalgak pay ni Advincula bayat ti inetrbio kenkuana ni Jun Ramos ti DWRS nga adu dagiti natangken ti ulona nga OFWs aglalo dagiti nabayagen iti Lebanon ket dida kayat ti aggawid agsipud iti kinarigat ti biag.

Mapattapatta a nasurok a 30,000 dagiti Filipino nga agtrabtrabaho iti Lebanon a kaadduanna kadakuada ti agpapaay a domestic helpers.

Iti kaudian a damag, addan nasurok a 5,000 nga OFWs a naibakuit ti turay manipud iti nasao a pagilian.

Ngem iti pannakaideklara ti ceasefire iti nagbaetan ti Israel ken ti Hezbollah guerrillas, mapattapatta nga ad-adu nga amang dagiti saan pay nga agawid ket ituloyda ti agtrabaho iti Lebanon.

Kinuna ni Advincula nga iti panagdudupudop dagiti evacuees iti simbaan nga imatonanna, nupay agduduma, dandani agpaparis dagiti estoriada.

“Mayroong sinuswerte, pero mayroong napunta sa di magandang amo (Adda napagasatan ngem adda met dagiti nakapan iti saan a nasayaat nga amo),” kinuna ni Advincula.

Kinuna ti kakaisuna a Katoliko Romano a Pinoy a padi iti Lebanon nga adu a bilang dagiti agdadamo nga OFWs ti nagpuersa nga agawid ta nagbutengda iti gubat iti Lebanon.

“This is a small country. Kahit nandoon ka sa sinasabing safe places, mararamdaman mo pa rin, makikita mo at maririnig ang pagsabog. Kaya nga yong mga baguhan dito, natatakot sila. (Bassit daytoy a pagilian. Uray addaka iti kunkunada a di peligro a lugar, mariknam met, makitam ken mangngegmo dagiti bumtak (a bomba). Isut’ gapuna a dagiti agdadamo ditoy, kasta unay ti butengda),” kinuna ni Advincula.

Imbatad ti padi a no isu laeng ti masurot, kayatna nga agawiden dagiti agdadamo ken mabuteng ken dagiti inna nga agsursuroken ti panaggianda (iti Lebanon), dagiti addaanen iti edad nga awan ti panggedanda no dadduma a nakalipaten iti pamiliada iti Pilipinas.

Kasta met nga indagadagna a saanen nga awisen dagiti kadaraan a nasayaat ti kasasaadda iti Lebanon.

“… Malaki ang kanilang sahod; mabait sa kanila ang kanilang mga amo. Katunayan may mga visa sila for Europe at anytime puwede silang dalhin ng kanilang employer, (kaya) hindi na sila hihikayating umuwi dahil maganda naman ang kanilang katayuan (… Dakkel ti sueldoda; nalaing kadakuada dagiti amoda. Kinapudnona, adda bisada para Europe ket aniaman nga oras, maikuyog latta ida dagiti employerda, (ngarud) saanen nga awisen ida nga agawid ta napintas ti kasasaadda),” kinuna ni Advincula.

Indagadag ni Advincula kadagiti kadaraan ti agtultuloy a panagtalekda iti kabaelan ti gobierno ken itedda (iti gobierno) iti pannakaaywan dagiti ipatpategda iti biag iti Lebanon ken iti panagtalekda iti Dios.

Comments are closed.