Footer

No agawidda, ania ti sangbayanda?

Inwaragawag ti turay nga iti baet ti pannakaiwayaten ti ceasefire iti nagbaetan ti Israel ken Hezbollah guerrillas, agtultuloy a pannakaibakuit dagiti overseas Filipino workers a naapektaran ti gubat.

Madakamat ditoy nga imbilin ni Pres. Arroyo a mapagawid aminen a Filipino nga agtrabtrabaho iti Lebanon gapu iti hostilidad iti nagbaetan ti Israel ken dagiti guerilla nga Hezbollah a nakaapektaran dagiti pinullo ribu a Filipino nga agtrabtrabaho iti nasao a pagilian.

Sakbay ti ceasefire, inwaragawag ti Israel nga ikalawana ti saklawen ti gubat agingga iti mapugipog ti Hezbollah tapno saannan a kabaelan ken mapukawen ti kapabilidadna a mangisaknap iti kinadamsak iti Israel.

Kasta met a mapaliiw nga inwayat daytoy ti Israel tapno nalawlawa ti masakupna a lugar sakbay ti pannakatinong dagiti pagilian babaen ti United Nations ti pannakaiwayat iti ceasefire iti nagbaetan dagiti dua a pagilian.

Daytoy ti kayat ti turaytayo a di mapasamak kadagiti kadaraantayo – ti maipit iti gubat iti nagbaetan dagiti dua a puersa.

Kas panagtungpal iti pammilin ni Pres. Arroyo, inaramid dagiti kameng ti embahada ken ti OWWA ti kabaelanda a mangallukoy kadagiti kadaraantayo nga agtrabtrabaho iti Lebanon nga agawiddan iti Pilipinas gapu iti pagamkan nga ikakaro ti hostilidad ti nasao a pagilian.

Iti katengngaan ti bulan ti Agosto, nasuroken a 5,000 a kadaraantayo ti naggawid iti pagilian.

Kikit laeng daytoy ti kadagupan a nasurok a 30,000 a Filipino a mapattapatta nga agtrabtrabaho iti Lebanon a kaadduanna ti domestic helpers.

Apay a kasta?

Segun ken ni Sek. ti Labor Manuel Imson, kadagiti nagawid nga evacuees, 57 porsiento kadakuada ti illegal a mangmangged ket awan ti pagpilianda no di agawid. Iti sabali a bangir, 43 porsiento kadagiti nagawid ti damona ti mangged iti nasao a pagilian ket buteng iti gubat ti kangrunaan a nangiduron kadakuada tapno agbakuitdan iti Pilipinas.

Sumagmamano a rason ti umuna nga umapay iti panunot no apay nga agkitakit dagiti nabayagen nga agtrabtrabaho iti Lebanon nga agbakuit.

Umuna, mamatida a saan nga agbayag ti gubat ket maideklara ti ceasefire iti babaen ti panangiyussuat ti United Nations. Agparparang a husto ti pattapattada ta itay Agosto 12, inanamongan ti UN a maipakat ti ceasefire iti nagbaetan ti Israel ken Hezbollah guerrillas ket sumrek dagiti tropa a mangkita iti pannakaiwayat ti kappia kadagita a lugar.

Maikadua, iti panagrikna dagiti nabayagen nga OFWs iti Lebanon, natalged ti biagda uray adda gubat iti daytoy a pagilian, maisupiat iti ibagbaga ti gobiernotayo a maipasungalngalda iti peggad ken patay gapu kadagiti panagbomba.

Kadagitoy nga OFWs, nakarkaro nga adayo ti riribuk idi kanisangapulo a tawen nga adda ti Lebanon iti civil war a dagiti Lebanese a mismo dagiti agrurupak. Ti saludsodda: dida pay naggawid kadagidi a panawen, ita ketdin?

Maikatlo, kaykayat dagiti kadaraantayo ti makigasanggasat uray iti lugar a gunggunggonen ti gubat agsipud ta nalidlidem ti sangladanda a biag no agsublida iti pagilian. Kaykayatda ti matay a makigasanggasat iti sabali a pagilian ngem iti matay a simumulagat iti bukodda a pagilian gapu iti rigat ti panagbiag.

Saludsodda: apay nga agawidda ket awan met ti namnamaenda a pagtrabahuan iti nakayanakanda a daga? Ania ti agur-uray a masakbayanda ken dagiti ipatpategda iti biag aglalo kadakuada a di nakaaddak iti nangato nga adal?

Saan a mailibak a kaadduan kadagiti kailiantayo ti pimmanaw iti pagiliantayo tapno maakkalda iti kinakurapay. Kadagitoy a kadaraantayo uray isugalda ti biagda, sarangtenda ti peggad tapno laeng lumung-awda iti biag. Kadakuada, nasaysayaat nga amang daytoy ngem ti agpampannurayda lattan iti duol wenno sangkaballing a pakagin-awaan nga ited ti gobierno. Maawatantay ngarud no apay nga agkitakitda nga agsubli iti pagilian.

Daytoy ti kasapulan nga aturen ti gobierno. Mangiwayat ketdi kadagiti addang tapno maawis dagiti kailiantayo nga agbati ken mangibukbok iti kabaelan ken serbisioda ditoy pagilian a saan ket nga iti sabali a nasion. Kasapulan ti ad-adu a panggedan, dakdakkel a sueldo ken insentibo kadagiti empleado ken mangmangged.

Dagitoy ti kasapulanda, saan ket nga iti iwarwaragawag ti uray a panangiwayatna iti addang tapno agbalinda a supermaid.

Comments are closed.