Footer

Sinagrap dagiti OFWs a pannakaabuso: sugat iti kaunggan a narigat nga aglunit (Maikadua a paset)

MAYSA ni Revelyn dela Rosa, 23, taga-Damacuag, Sta. Lucia, kadagiti OFWs nga awan gasatna iti pananggedna iti Lebanon.

Simmangpet ni dela Rosa iti Lebanon idi Pebrero 13, daytoy a tawen ngem awan pay makabulanna, pinagawid dagiti amona. Nakabirok iti sabali nga amona, maysa a Maya Abla, ngem di nagbayag iti denna daytoy.

Nagallaalla ni dela Rosa agingga a nagtungpal iti embahada ti Pilipinas.

Iti pannakiuman kenkuana ti DZTP Radio Tirad Pass ken Tawid News Magasin, impalgak ni dela Rosa nga adu dagiti kas kenkuana a nanglibas kadagiti amoda a nagpaing iti embahada.

“Adu dagiti employer a mangsurot kadagiti naglibas a katulongda a Filipina ta di pay nalpas ti kontratada,” kinuna ni dela Rosa.

Karaman ni dela Rosa iti umuna a batch dagiti evacuees a simmangpet iti pagilian idi Hulio 23.

Inannugot ni dela Rosa nga aglaplapusanan a ragsak ti simmangbay kenkuana idi makitana ti inana, ni Julieta, nga agur-uray kenkuana iti airport.

Kinunana a ti arakup ti mail-iliwan nga inana ti kasam-itan a nariknana.

Iti sabali a bangir, ken ni Grace Lazarte, 32, ti Tamurong 1st, Candon City, ti panagbettak ti hostilidad iti nagbaetan ti Hezbollah guerrilias ken ti Israel, ti nangted kenkuana iti gundaway a manglibas kadagiti abusado nga amona.

“No saan a naggubat, addaak pay la iti Lebanon nga agkatangkatang,” kinuna ni Lazarte.

Abusado ti natumpongan nga amo ni Lazarte. Bassit laeng a biddutna, dusaen ti amona.

No dina madalusan ti ashtray iti nagrungrongan, siniten ti amona a babai iti beggang ti sigariliona. Bassit laeng a buok a maiwara iti suelo, pungoten a guyoden ti amona sana idumudom iti lat-ongan.

Segun ken ni Lazarte, kape ken biskotso laeng maminsan iti inaldaw ti it-ited dagiti amona a kanen idinto nga agtrabaho manipud iti 3:30 ti parbangon agingga iti tengnga ti rabii. Ginandat pay ti amona a ramesen.

Dagitoy ti gapuna a naglibas. Bayat ti panagdaliasatna iti alas kuatro ti parbangon, pinanggep a ramesen ti dua a Lebanese ngem nakiranget.

Nakakita iti tienda ti Filipino ngem nakaserra metten. Ditoy a nagdalupisak ken nagsangit.

“Nagsangsangitak. Pigispigis ti badok… iggemko ti rosario ken prayer bookko. Awan ti ammok a papanak… awan ti am-ammok,” kinuna ni Lazarte.

Maysa nga Amerikano ti nangaasi ken nangiplete kenkuana iti lugan a nagturong iti embahada ti Filipinas.

Ditoy embahada a naabutan ti gubat.

“Diakon agabrod… diakon panawan ti asawak ken annakko,” kinuna ni Lazarte.

[ Adda tuloyna ]

Comments are closed.