Footer

Arig agkalay-at iti bantay

KAS panangpaneknek ti administrasionna a sinsero a mangkondenar kadagiti pammapatay a politikal, inwaragawag ni Pres. Arroyo ti pannakabuangay ti maysa a komision a mangiwayat iti independiente a panagpalutpot.

Idauluan ni dati a Supreme Court Justice Jose Melo ti komision a pakaibilangan dagiti uppat a miembro, da National Bureau of Investigation Director Nestor Mantaring, Chief Prosecutor Jovencito Zuño, Bishop Camilo Gregorio ken Nelia Teodoro-Gonzales ti University of the Philippines Board of Regents.

Kinuna ni Pres. Arroyo a daytoy ti pammatalged iti panangkondenar ti administrasiona iti “kagubsangan a posible a termino” kadagiti political killings idinto nga inyunay-unayna nga iti lima ket kagudua a tawenna iti puesto, awan uray maysa a nakonbiktaran nga impatulodna iti death chamber.

Segun iti Presidente, agbalin ti komision a kredible ken independiente ken makawesan iti naan-anay a bileg ken pundo tapno maipakatna ti naipabaklay nga annongenna.

“Maaddaan iti amin a bileg nga aggapu manipud iti Presidente,” impasingked ni Arroyo idinto nga innayonna a kayatna a masolbar, mapasardeng dagiti political killings ta “napigsatayo a mamati iti kalintegan a pantao iti Pilipinas.”

Kunana pay nga intiempona ti pammilinna babaen ti Executive Order No. 559 a pannakabuangay ti komision iti pananglagip iti maika-23 a tawen a pannakapapatay ni dati a Senador Benigno “Ninoy” Aquino iti tarmac ti Manila International Airport (Ninoy Aquino International Airport itan) agsipud ta daydi senador ti “kalatakan a biktima ti political killings.”

Ngem ita pay laeng, sinabaten ti panagduadua ken suspetsa daytoy binuangay ni Pres. Arroyo a komision.

Madakamat ditoy a naglak-am ni Pres. Arroyo iti pammabalaw manipud kadagiti kritikona, dagiti lokal ken internasional a gunglo gapu iti mapaliiw a yaadu iti bilang dagiti mapapatay nga agiwarwarnak ken kameng dagiti grupo a militante ken iti mapapati a nalanay a tignay ti turay a mangsolbar kadagitoy a pammapatay ken maisaklang dagiti agisaysayangkat.

Pagarigan ti Amnesty International, binabalawna ti turay ni Pres. Arroyo gapu iti mapaliiw a kaawan gawayna a mangpasardeng kadagiti panagpapatay a maikontra kadagiti agiwarwarnak ken kamkameng dagiti militante ken kumankannigid a grupo.

Sumangkautro ta iti State of the Nation Address ni Pres. Arroyo, imbatadna a kondenaren ti administrasionna dagiti political killings ngem kalpasanna, pinadayawanna ni Major Gen. Jovito Palparan, hepe ti 7th Infantry Division ti Army.

Saan a nasayaat ti panagsaad daytoy nga inaramid ni Pres. Arroyo kadagiti kritiko ken biktima dagiti pammapatay.

Itudtudo dagiti militante a grupo ni Palparan a mapapati nga adda iti likudan dagiti pannakapapatay ken panagpukaw dagiti kakaduada nupay kuna met ti militar a ti New People’s Army ti agisaysayangkat kadagiti pammapatay.

Iti panagkuenta dagiti militante a grupo, aganayen a 700 a kakaduada ti napapatay manipud nagtakem ni Pres. Arroyo.

Uray ni Presidente ti Catholic Bishops Conference of the Philippines Arsobispo Angel Lagdameo, linagidawna dagiti political killings agsipud ta “saan a nainkalintegan a mapapatay dagiti tattao a pagbatayan ti panagsusupadi iti pammati iti politika wenno iti pannakaatap a maysa a subersibo wenno agpanggep iti dakes maikontra iti gobierno.”

“Senial ti saan a nademokrasiaan a sosiedad dagiti political killings ken human rights violantions,” kinuna pay ni Arsobispo Antonio Ledesma, bise presidente ti CBCP sana impaganetget a “dakkel a pakaibabainan ti gobierno a saan a siwayawaya dagiti Filipino a mangaramid kadagiti kalinteganda iti politikal a panangibatad ken pannakilangen.”

Ngarud, arig agkalay-at iti bantay ti komision a binuangay ni Pres. Arroyo a manggun-od iti panagtalek ken suporta dagiti kritiko nangruna dagiti biktima dagiti pammapatay ken pannakarabngis iti kalinteganda a kas tao.

Nupay awan ti maipilaw ken ni Melo, dakkel ti reserbasion dagiti umili kada NBI Director Mantaring ken Chief Prosecutor Zuño gapu ta agpapaayda iti gobierno, iti pay met babaen ti opisina ti Presidente.

Sa ita, kinuna ni Bishop Gregorio a nupay pakaidayawanna, saanna a maannong a naan-anay ti maipakumit a pagrebbenganna gapu iti annongenna iti Simbaan ken iti kaadayo ti parokiana (Batanes) iti Manila.

Umno laeng ti pangngeddeng ni Bishop Gregorio, kuna dagiti saan a mamati ta iti paniriganda, agbalin laeng a dekorasion ti obispo tapno agbalin a kredible ti komision agsipud ta ibagianna ti Simbaan.

Iti biangda, uray mano a mabuangay a komision, saanda a malapdan dagiti pammapatay. Ti laeng Presidente ti makapasardeng kadagiti political killings, kunada.

Nairanrana wenno saan, sumagmamano nga aldaw kalpasan ti pannakabuangay ti komision, nagsasaruno manen dagiti naisayangkat a pammapatay a nakaibuisan ti biag dagiti kameng ti militante a grupo.

Mangiwayat koma ni Pres. Arroyo ti naing-inget nga addang tapno mapasardeng iti kasla piek a pannakapugipog kadagiti kamkameng dagiti grupo a mangdildillaw iti turay ken dagiti agiwarwarnak. No agtultuloy latta dagiti pammapatay, dakkel a milat iti administrasionna. Agingga iti saanda a mapasardeng, agngatngata dagiti negosiante nga umay mangibaut iti puonanda ditoy pagilian.

Iti sabali a bangir, saan a produktibo dagiti umili no saan a natalged ken nasimbeng ken agay-ayuyang ti amak, buteng ken aliaw iti kaungganda gapu ta mabalin a bigat-kasangaldaw, isuda ti sumaruno a maipalnaaw iti kangitingitan ti rabii.

Kasano a magun-od ti tartarigagayan ti turay a panagdur-as ti pagilian no kastoy met ti mapaspasamak?

Comments are closed.