Footer

Balo wenno ni Baro (Maikadua a paset)

MANGITURTURONG:

Ti mangirupir iti baro ket ni (nagan ti speaker) a napintas
Nakapimpintas ta maysa ngarud nga Ilokana nga imnas
No aniaman ti argumentona iti naidatag a pakarikutan
Intay ngarud denggen ken imdengan
Ta isunto dayta ti inna pakahusgaan
Iti daytoy nalatak a bukanegan

Ti mangirupir ket ni manong balo a nagaget
Ken addaan iti saguday a nakasingsingpet
Ket siempre ti kalakian iti bukanegan
Nga isu daytoy ni (nagan) ket intay met imdengan

Adda mangsensenias man kaniak
Ti rupak kano ket itay pay la koma a rinugiak
Ta maganatandan ket, apay a siak ket kutak a kutak
Tapno awan ti makunayo, apo, alan, rinnupak
Awagak ngaruden ti prinsesa a mangitupak
Ti rasonna nga utoben ken mangparagsak
Ala ngaruden prinsesa, kapanunotam inkan ipasaksak
Dakayo met amin amin pasabatantayo iti palakpak!

 

PRINSESA TI BUKANEGAN

Adda nakitak sadiay a ti tanganna impatakderna
Ta ayonanna la ket a ti guapo a baro ti kaikarianna
Ta kasna la yik-ikkis a ti balasang ket para laeng iti baro
Awanen ti sabali pay a pagpasaganna lalonan no balo
Ta amangan no maal-allia pay ken di immuna no di makapudno

Dayta balo ket kasla wagwag wenno ukay-ukay
Nga addan ti immuna a makinkukua sakbay nga immapay
Isu a no ipapilityo a dayta balo, ti agbaak a ket kaykayatko pay
Ta nataltalna ti panunotko agingga alaennakon ni Patay

 

MANGITURTURONG:

Ne, ta nauneg ti pagtaktakderan a kapanunotan
Ti napintas ken masirib a prinsesa ti bukanegan
Dina kano kayat ti balo ta kasla wagwag
Anian, dina kayat ti seken han kunana nga inwaragawag
Ket nataldiapak pay ti prinsipe nga uray la nanglapayag
Iti pannakangngegna iti rason ti balasang a nadayag

Ala ngarud, inka man sungbatan
Prinsipe ti bukanegan ti nangngegam a kalintegan
Ti kabaddungalam itoy a pagsasalisalan
Ngarud yawatko kenkan ti kakaisuna a karbengan
Ta ammok a maganatankan ken matektekan
Ngarud, apo a naitallaong intay ngarud palakpakan!

 

PRINSIPE:

Itay pay laeng, apo mangiturturong, a matektekanak
Ta diak man magustuan ti rason a nangngegak
Ta kasla timek ti karag a gumanakgak a gumanakgak
Awan ti kaimudinganna iti lubong uray pay rabrabak
Isu nga ita pay laeng ibagakon, siak ti mangabak!

Ading a prinsesa ti bukanegan ibagak kenka
Ti pagsusikanta iti panunot ket adda pagsasaona
Isu daytoy ket denggem, ta ibagak kenka, kunada:
“Naim-imas nga adayo ti kinirog nga umas-asuk
Ngem dayta nay kalluto a naagub ken agatbinukbok”
Uray no sekenhan a kunam no isu ti kamayatan
Ibasuramon dayta baro a kaaalasan
Ta dikanto ket agrungaab ken agkulitagtag iti udinan

 

MANGITURTURONG:

Anian, ta maysa a pagsasao ti nangirugianna
Iti ipettengna a panirigan ken kapanunotanna
Ania itayen daytay pagsasao a kunana
“Naim-imas ti kinirog nga umas-asuk
Ngem dayta kalluto a naagub ken agatbinukbok?”

Naa, papagayam a naitallaong, nauneg ti rasonna
Ta maysa a repran wenno pagsasao-Ilokano a makuna
Banag a dakkel met dayta a pangabilna
Lalo pay a, no daytoy ket madepensaanna
No aniaman ti kayat a sawen dayta a pagsasao
Urayentayo man ta ilawlawagna amin kadakayo

Ala ngarud, ading balasang, tumakderkan
Batangmo manen ti agsao ken agikalintegan
Laingem unay ket itakdermo ti kapanunotan
Tapno dagiti dumdumngeg ket indaka pagrukbaban
Lalo no, ni manong baro, ket ibalatmo itoy a salisalan

[ Adda tuloyna ]