Footer

Negosiante, binagkong ti menor de edad, natay

SAN JUAN, Ilocos Sur – Malaksid iti mapapati a panggepna nga agtakaw, napatay pay ti maysa a menor de edad ti baket nga akinkukua iti sarisari store iti uneg ti tiendaan ditoy ket agdama a birbiroken dagiti polis.

Nabigbigen ti suspetsa ngem saan nga inlatak dagiti polis ti naganna.

Segun iti report, nakapuot ni Johnny Ines gapu iti kanabtuog ken ariwawa ket nakitana ti asawana, ni Milagros Roldan, 68, a makirangranget iti suspetsa.

Nakigubal ni Ines iti suspetsa ngem nakaalut-ot daytoy sa naglibas.

Idi arayaten ni Ines ti asawana, nakitana laengen a nadigos iti dara.

Intarayda ti baket iti Pira Clinic and Hospital ngem naideklara nga awanen ti biagna.

Iti panagimbestiga dagiti polis, natakuatanda nga immuli ti suspetsa iti bubong sa nagna iti bobeda iti iseserrekna iti tienda dagiti agassawa.

Nakarekober dagiti polis iti imuko iti nakapasamakan ti krimen.

Panagtakaw ti mapapati a motibo ti suspetsa iti iseserrekna iti tienda.