Footer

OFW, nagyaman iti tulong ti Ilocos Sur Hotline

VIGAN CITY – Uray iti kaaddan ti maysa nga overseas Filipino worker iti lugar a nakayanakanna, sumursurot latta ti lagip ti dakes a napasaranna iti ima dagiti abusado nga amona a Lebanese.

“Naramanak ti pungot, tungpa… adda pagkamaliak, agbugkawda, didak pakanen,” di nagawidan ni Mary Grace Urbano ti panagsangitna bayat ti panangisalaysayna kada Chato Alda, manager ti DWRS, ken ni Eugene Paet, agpada nga anchor ti programa nga Ilocos Sur Hotline, iti dakes a linak-amna bayat ti nasurok a makatawen a panagtrabahona iti Lebanon.

Nagturong ni Urbano, residente ti Tamag ditoy ken ina ti dua nga ubbing iti DWRS itay Agosto 21, tapno mismo nga agyaman ken ni Gov. Luis “Chavit” Singson ken ti programana nga Ilocos Sur Hotline gapu iti naipaay daytoy a tulong iti panaggawidna iti pagilian.

Kinuna ni Urbano nga iti makatawen ken dua a bulan a panagtrabahona iti Lebanon kas domestic helper, saan a binulan nga ited ti amona ti $150 (P7,500) a sueldona.

“Uray ibagam, dida iyawat, agurayka kunada,” kinuna ni Urbano sana innayon a saanda a makaruruar iti balay a paggiananda ket kandaduan ti amoda ti ridaw no pumanaw daytoy.

Nagpaarayat ni Urbano kadagiti dadakkelna ket nagpatulong dagitoy iti Hotline para iti madagdagus a pannakapagawidna.

Naammuan ken ni Urbano nga aduda a naallukoy a mapan agtrabaho iti Lebanon agsipud ta nalaka ti placement fee ken babaen ti “fly now, pay later” a package deal.

Kinunana a tallo a bulan nga inkarona, sa adda pay binayadanna iti ahensia, malaksid laeng dagiti sabali nga utangna a tinultulodanna.

Kinunana a linibasanna ti amona agsipud ta saan a kayat a palubosan daytoy.

Impalgak ni Urbano nga uray idi kalpasan ti panaglibasna ken panagpaingna iti embahada ti pagilian, sinurot ti amona ket nagkariar ngem di pinalubosan dagiti staff ti embassy a rummuar.

“Ti ammona ngata, isakitda (soldado) ta Lebaneseda, ngem (idi kuan), naalana ti nagbuteng, impalladawna ti passport iti lamisaan,” panangisalaysay ni Urbano.

Kinunana nga adda met dagiti nadamdamagna a pannakaabuso dagiti padana a Pinay iti Lebanon ngem “ti ammok, saan a kastoy kagrabe, ken saan a kasta amin nga amo,” idinto nga innayonna a pannakigasanggasat ti panagabrod.

Kinuna ni Urbano nga agbirok iti panggedanna, saanen nga iti Lebanon, no di iti sabali a pagilian.

Kabayatanna, rinambakan ti Ilocos Sur Hotline ti maikapito nga anibersariona itay Agosto 28. Mismo a ni Gov. Luis “Chavit” Singson, Vice Gov. Deogracias Victor “DV” Savellano ken Bokal Ronald Singson ken Mayor Roque “Jun” Verzosa dagiti nangidaulo iti selebrasion a dinar-ayan dagiti bokal a pakairamanan da Bokal Orlino Tesoro, Bokal Bagbaguen, Bokal Chita Cordero, Bokal Ronnie Rapanut ken dagiti hepe dagiti nadumaduma nga ahensia.

Iti daytoy nga aldaw, ginasut nga umili ti nagdudupudop iti DWRS tapno agpatulong ken makirambak iti anibersario ti Ilocos Sur Hotline.

Adu dagiti premio a naiwaras bayat ti selebrasion. Malaksid kadagiti kuarta, adda electric fan, radio ken TV, idinto a sabali laeng dagiti 20 a kalding a pangganakan ken 2 a baka a naited kadagiti napagasatan a mabunot ti numeroda.