Footer

Balo wenno ni Baro (Maikatlo a paset)

PRINSESA TI BUKANEGAN:

Ti kasalisalko ket ti tema inyarigna iti innapuy
Makaisemak ta ti rasonna ket nakakapkapuy
Ta no masirib koma ti rikna ti timbangenna
Ta ti rikna isu iti pagtaudan iti ragsak a naipangruna
Isu a kasalisalko dumngegka man ala
Ta ibagak kenka nga awan iti sasairna
A ti baro ket para laeng iti balasang
Ta dayta iti natural nga inda kaipapanan
No ti baro ket adda kunkunana
Dumtengto met a, iti panagbalbaliwna
“Saan amin a panawen ket agbagbagio
Sumingising met ti init,” maysa dayta a pagsasao
No dimo naawatan ti nakunak
Ibagakon ti nabayagen a kapaliiwak
Natural ti baro a ti biagna ket barengbareng
Ta di ti responsibilidad kenkuana di pay dimteng

PRINSIPE TI BUKANEGAN:

Ti panagbalbaliw ket dika mangnamnama
Lalo kadagiti adda sakitna a bato, batugan a kuna
Isu nga ita pay laeng dumngegka koma
Ti balo ti pilliem dikan aginkukuna!

PRINSESA TI BUKANEGAN:

Inton simrek dayta iti estado ti naasawaan
Agbalbaliw daytan ipamaysananton pamilianan
Ta awan ti Ilokano a pamiliana inna baybay-an
Isu a mas piliek ti baro a saan ket a dayta sekenhan
Ken adda pay ti “extra baggage” a putotnan
Ayna, kaka, aya, iti likudak indakto la ketdi katawaan
Ta nengnengak a nagpili iti nakiasawaan
Lalo no isutilda kaniak ti diak masbaalan
No: “instant anak, second hand husband”
Kunadanto nga igarakgak ken illekan
Uray no uso ita ti instant ken wagwagwagan
Sabalin a saritaan no maipapan iti panagasawan

Wenno “Kasla agraraman!” kunada a pasarunoan
“Kasla maibusan a,” kunanto ti maysa nga ipakamakam
Dipay ket tungpal biagko siakton ti mariribukan
Isu a kunak a diak naragsak iti balo a kadennan

PRINSIPE TI BUKANEGAN:

Ne, daytoy ti laglaglagipem, adingko a kalaban
Ti panagasawa ket saan a ti langa ti kangrunaan
No di ket ti ayat nga agubbog iti puso a kasayaatan
Ta ti ayat isut’ pagtaudan ti talinaay ken kappia
No adda talinaay ken kappia iti uneg ti pamilia
Naurnos a pamilia dayta, pudno a naidumduma
No ti balo ket maipaayna amin dagita
Nasaysayaat ngem ti baro a sadutna ket kakaroan
Amangan no ultimo nagkapeanna a tasa dina mainnawan
Wenno ti sangkaballing a briefna ket dina pay malabaan
Namak payen dayta no inna pay napultitan
Wenno saan ket dina pay ammo agiggem iti sagad
No trabahom amin amin, ayna sikan ti “sawimpalad”

PRINSESA TI BUKANEGAN

Dumteng met ti panagbalbaliw ti maysa a tao
Namnamaek daytoy a mapasamakto
Isu ngarud a kaykayatko ti baro
Ta agkabagaykami nga agpayso

PRINSEPE TI BUKANEGAN

Iti balo a nasingpet ken nagaget ket nanam-ayka
Sigurado nga iti pagtaengam ket sika iti reyna
Ngem no dayta baro iti inka pinili
Iti udina luam ti inumem inka agbabawi
Ta amangan no sumangpet pay iti rabii
Adda ti kakuyogna a sabali a seksi
Sanakanto pay laeng laawan a kadakuada inka agserbi
Anian a nagpait ti nakaikariam, sikan ti agbabawi
Ngem awan ti umuna a babawi no di ket maudi
Isu a ti balo laengen iti inka pilien sigurado saan a natiri

[ Adda tuloyna ]

Comments are closed.