Footer

Bird Flu Virus Task Force, nabuangay

VIGAN CITY – Nabuangay itay nabiit ti Provincial Avian Influenza Task Force ti Ilocos Sur babaen ti Executive Order No. 3, series of 2006 nga impaulog ni Gobernador Luis “Chavit” Singson.

Saklawen ti nasao a pammilin ti panangaramid ti grupo iti Avian Influenza Preparedness and Response Plan; mangisayangkat iti advocacy/information dissemination kadagiti barangay maipanggep iti pannakalapped ti avian influenza ken ti pannakapasardeng ken kontrolna; makitinnulong pay kadagiti Barangay Health Emergency Response Teams (BHERTs) a mangted tulong tapno maisayangkat dagiti plano; mangkita ti pannakaiwayas ken pannakaipatungpal dagiti pagallagadan ken aktibidad maipanggep iti programa; mangirekomendar kadagiti wagas a mangidur-as ken mangsigurado ti viability ken epektibo a pannakaipatungpal ti programa; ken mangted iti report maipanggep iti pannakaipatungpal ken pannakamonitor daytoy a programa.

Naipasdek ti task force kas sungbat ti gobierno probinsial iti panangidagadag ti Department of Interior and Local Government kadagiti amin a lokal a gobierno a suportaranda ti pannakalapped ken pannakakontrol ti avian influenza wenno bird flu.

Kameng ti task force da Gov. Luis “Chavit” Singson (Chairman), Vice Gov. Deogracias Victor “DV” Savellano (Co-Chairman), ken da Bokal Jeremias “Jerry” Singson, Bokal Alexander Bistoyong, ABC Pres. Ponciano Bagbaguen, PNP Provincial Director, Sr. Supt. George T. Regis, Provincial Health Officer Carmeliza Singson, Provincial Veterinarian Ernesto F. Mendoza, Division Schools Superintendent Rogelio Galat, Provincial Labor Officer Antonio Gutierres, Provincial Agricultural Statistics Officer Dionisio Anaban, Jr., Provincial Statistics Officer Urbana Romano, Provincial Environment OIC Agerico Bueno, Philippine Information Agency Manager Maria Nila Ortega-Argel, DA APCO for Ilocos Sur Cesar Escobar, PAFC Chair ti Ilocos Sur Teresito Batin ken Ilocos Sur Poultry Raisers’ Association President Claudio Tajon.