Footer

COP, kinarit ti sibilian

NARVACAN, Ilocos Sur – Posible a sumango iti kaso a direct assault upon a person in authority ti maysa a tricycle driver kalpasan a kinaritna ti hepe ti polis ditoy.

Nainaganan ti tricycle driver a ni Jakeson Lucindo, 21, residente iti Parparia, Narvacan, Ilocos Sur a mapapati a nangkarit ken ni PCI Marlo Castillo, agdama a chief of police iti daytoy nga ili.

Segun iti report, naammuan a ni Major Castillo, agraman dagiti dadduma a kaduana a polis ditoy, ti nangisayangkat iti foot patrol ket kabayatan ti ilalabasda iti Amigos Videoke iti Barangay Santa Lucia, nairana a rimmuar ti suspetsa a mapapati a nabartek a nagkunaan ti COP iti: “Adda sa met tamamon, gayyem?”

Maipagarup a pabaribar a simmungbat ti suspetsa, “Wen, ania problemam kaniak?”.

Mapapati a darupen koma ti suspetsa ni Castillo ngem naigawid dagiti kaduana a pulis.

Impan dagiti polis ti suspetsa iti Central Ilocos Sur District Hospital tapno maammuan ti level ti nainomna nga arak.

Kabayatanna, sabali pay a mapapati a drug pusher ti natnag iti buy-bust operation nga insayangkat ti PDEA Region I ken pannakikammmayyet ti polis ditoy itay nabiit.

Inaresto dagiti polis ni Ciony Valera, 33, mapapati a drug pusher, residente iti barangay Paratong, iti buy-bust operation a naisayangkat iti Barangay Sta. Lucia ditoy.

Nakumpiska ti raiding team ti 2 a heat-sealed sachet nga addaan iti mapapati a shabu, ken P500 a marked money nga addaan marka YB-122708 ken RCC.

Paset ti operasion ti agtultuloy a kampania ti polis ditoy a mangpugipog iti maiparparit a droga.

Comments are closed.