Footer

Dua a bus nagsinnapgid

STA. MARIA, Ilocos Sur – Nagsinapgid ti maysa a Dominion Bus Line ken Philippine Rabbit iti aksidente a napasamak iti barangay Poblacion Sur, Santa Maria, Ilocos Sur itay nabiit.

Ti Dominion bus nga addaan iti plaka AVS-265 ken body number 8057 ket minaneho ni Arnold Pasuquin, 48, residente iti barangay Marcos, Santa, Ilocos Sur idinto a ti Philippine Rabbit nga addaan iti plaka a CYR-901, ket minaneho ni Mykle Baoiran, 32, ken taga-Davila, Pasuquin, Ilocos Norte.

Iti inisial nga inbestigasion dagiti pulis, naammuan a liniklikan ti agtartaray a Dominion bus ti maysa a cargo trailer truck nga addaan plaka RCZ-773 a nakaparking iti abagatan a paset ti national highway a sakup ti Poblacion Sur, ditoy nga ili.

Iti dayta a tiempo, sumungad met ti Phil. Rabbit ket ditoy a napasamak ti panagsinnapgid dagiti dua a lugan.

Awan ti naan-ano kadagiti pasahero ken drayber, ngem nagsagrap iti pannakadadael dagiti nasao a lugan.