Footer

Dua a Filipino ti kangrunaan a kandidato para iti US 2nd Congressional District

DUA a Filipino ti agkalikagum a pabutosan itoy nga eleksion iti Hawaii 2nd Congressional District a mangibagi idiay Washington DC: da State Senator Ron Menor ken Honolulu Councilman Nestor Garcia.

Iti San Nicolas, Ilocos Norte ti puon ni Menor idinto nga iti Bisaya ni Councilman Garcia.

Saklawen ti 2nd US Congressional District ti part Oahu-Leeward-Windward ken dagiti isla ti Maui, Big Island, Molokai, Lanai, Kauai. Nabakantean daytoy a puesto.

Karaman a kabalubal da Menor ken Garcia dagiti dadduma pay nga agtaray a nagtaud iti sabali a puli. Naggibus ti aldaw a panagipila iti kandidaturada idi Hulio 25 daytoy a tawen.

Asino kada Menor ken Garcia, agpada a maraem ken respetado iti Hawaii politics, ti mapagasatan nga umuna a Filipino a mangibagi iti US Congress idiay Washingtron DC?

No ibatay iti pakasaritaan ti politika, marka iti historia da Atty. Peter Aduja, i-Vigan ta isu ti immuna a representante iti Territory of Hawaii. Ni met Benjamin Menor, ama ni Ron Menor, ti immuna a Filipino a senador iti Hawaii ken immuna a Filipino a nagkameng iti Hawaii Supreme Court kas Supreme Court Justice. Simmaruno kenkuana da Hon. Mario Ramil ken Hon. Simeon Acoba, agpada nga annak ti Bacarra, Ilocos Norte.

Kangrunaan a patanor ti politika a Filipino ni Hon. Benjamin J. Cayetano, (i-Urdaneta, Pangasinan), umuna a Gobernador a Filipino iti Hawaii, ken umuna a Filipino nga agakem iti kasta nga elektado a puesto iti USA.

Ita, iti maikadua a daras, agtaray ni Senador Ron Menor, idinto nga umuna met daytoy a gandat ni Konsehal Nestor Garcia, dati a TV personality.

Iti sabali a bangir, pukaw ti komunidad ken ti Hawaii State Legislature ni Rep. Felipe “Jun” Abinsay (Vigan City) agsipud ta saanen nga agpailayon gapu iti salun-at. Sangapulo ket maysa a tawen ni Abinsay iti pagpandayan-linteg ket isu ti pangulo ti House Committee on Agriculture iti walo a tawen. Kayat ni Abinsay nga ited ti panawenna iti pamiliana ken ti komunidad.

Sangagasut sangapulo ket maysa dagiti elektibo a puesto a pagtarayan dagiti mayat a kandidato manipud US Senator, US Congress, Hawaii Governor, Hawaii Lt Governor, State Senator, State Representatives, Councilmembers, Board of Education, Office of Hawaii Affair.

Itay Agosto 24 ti maudi nga aldaw a panagrehistro tapno makabutos iti eleksion primaria a maangay inton Setiembre 23 ken eleksion heneral a maangay inton Nobiembre 7.

Mabalin metten ti agkiddaw iti absentee ballot tapno agbutosen uray saan pay a dimteng ti Setiembre 23.

Ti kandidato iti agsumbangir a partido a makagun-od iti kangatuan a butos iti eleksion primaria ti agsalip iti eleksion heneral ket ti mangabak ditoy ti mangibagi iti distrito a pagtarayanda.

Dagiti sumaganad dagiti dadduma pay a kandidato a kadaraan wenno maipagarup nga adda darada a Filipino ken ti puesto a pagkandidatuanda.

Senatorial District: (25 a puesto)

(Holdover ni State Senate President Bobby Bunda)

9th district (Kahala-Palolo) – Michael Palcic (R)

14th district (Kalihi Valley-Halawa) – Donna Mercado Kim (D), pailayon,
20th district (Ewa- Kapolei-Ewa Beach) – Will Espero, pailayon (D); Lacuesta, Celeste (D)

State Representatives (51 a puesto)

15th district (Wailua-Koloa-Kauai) – Ronald Agor (R)

16th district (Niihau-Poipu-Kokee-Kauai) – Rhoda Libre (D); Roland Sagum III (D)

29th district (ti pagpanawan ni Rep. Abinsay) (Kalihi-Kapalama) – Earl Cachola (D); Joey Manahan (D)

30th district (Alewa Hts-Kalihi) – Rick Manayan (R), Terry Visperas (D)

32nd district [(Mapunapuna-Foster Village) – Lynn Berbano Finnegan, pailayon, (R)

35th district(Pearl City-Waipahu) – Atty. Alex Sonson, pailayon (D); Constante Domingo (R)

41st district (Waipahu-Waikele) – Rito Saniatan (R)

42nd district (Waipahu-Ewa) – Rida Cabanilla-Arakawa (D), pailayon; Rey Rodriguez (R)

43rd district (Ewa Beach-Iroquis Point) – Kimberly Marcos Pine (R), pailayon

46th district (Schofield-Kahuku) – Michael Magaoay (D), pailayon

Honolulu Council – Donovan dela Cruz, pailayon – non-partisan (holdover ni Councilman Romy Cachola)

Maui Council – Joe Pontanilla, pailayon, nonpartisan

Molokai – Danny Mateo, pailayon, nonpartisan

Masipsiputan ngarud no asino kadagitoy kadaraan ti ibayog dagiti kailianda, aglalo dagitoy dua a kangrunaan a kandidato iti US 2nd Congressional District.

Comments are closed.