Footer

Green Phil. Highway project, maiserrek iti Guinness Book of Records

ITI idadateng ti alas dies ti bigat itay Agosto 25, naglilinia dagiti umili iti igid ti national highway iti rehion ken kadagiti nadumaduma a paset ti pagilian sada naggigiddan a nagmula iti kayo.

Kinuna ni Engr. Victor Ancheta, agdama a regional executive director ti DENR, Region a naisayangkat ti mass tree planting para iti panangsaluad iti aglawlaw nangruna iti polusion.

Iti daytoy nga aldaw a naisayangkat ti nationwide launching ti Green Philippine Highways Project a kang-runaan a proyekto ti Department of Environment and Natural Resources nga idadauluan ni Sek. Angelo Reyes.

Inyunay-unay ni Ancheta ti kinapateg iti aglawlaw daytoy a gannuat.

“Kaadduan a pagtaudan ti polusion ti ipugso dagiti luglugan; in fact, 70 percent of air pollution comes from vehicles, and this occurs at the highways. So we wanted to control the problem… kaya iti highway ti nagmulaantayo,” kinuna ni Ancheta bayat iti interbio kenkuana ti DZTP ken Tawid News Magasin.

Kinuna ti regional director a maigapu iti panagballigi ti naisayangkat a programa iti rehion uno, ken iti sangkapagilian, panggep ti gobierno nga idatag daytoy iti Guinness Book of Records.

“Maiserrek iti Guinness book of records daytoy naggigiddan a sapasap a panagmula iti kayo,” kinuna ni Ancheta.

“No nairanakayo a dimmalliasat iti national highway idi Agosto 25, nangruna iti sakbay ti alas dies ti bigat, nakitayo la ketdi dagiti adu a partners ti DENR a timmulong a nagmula,” kinuna ni Ancheta.

Indagadag ti DENR kadagiti local government units iti pannakikammayyetda nga agmula iti kaykayo tapno mapagtalinaed a naberde ti aglawlaw a panglapped iti polusion.

Comments are closed.