Footer

Naglibas ni Boy Kimat! (Umuna a paset)

Pinengdan ni Police Chief Inspector Jessie Lucas ti panagsuyaabna. Tinaliawna ti relo iti pungupunguanna. Alas dies ti bigat. Nainayad ti panagpataray ni PO2 Melvin Roxas. Domingo ket tumuyutoy dagiti tao iti Quezon Avenue.

Linabsanda ti Two Brothers Grocery. Adu ti makitienda iti abastoda.

Agsikkon ti mobile patrol iti Liberation Street idi naguni ti transmitter. “Calling all mobile cars… Calling all mobile cars…”

Pinidut ni Jessie ti auditibo. “Mobile car 17…” kinunana.

“Nakalibas ni Andres Bondoc, alias Boy Kimat, iti pagbaludan! Pinatayna ni PO3 Queddeng, ti guardia. He is believed to be in the vicinity of Tamag Village. Take no chances. He’s dangerous! Innalana ti kuarentay singko ni Queddeng!”

Naamil ni Jessie ti bibigna. Itay laeng napan a lawas a nasentensiaan ni Boy Kimat. Nanghold-apda ken ni Alias Diango iti taksi. Nakiranget ti drayber ket dinugsol ni Boy Kimat iti imuko a puon ti ipapatayna.

Immuna a natiliw ni Diango ket intudona a ni Boy Kimat ti nangdugsol iti taxi driver.

“Naiwaragawag kadin iti radio tapno maballaagan dagiti umili?” dinamag ni Jessie.

“Wen. Naiflash payen iti TV.”

Nagsakuntip ni Jessie. Am-ammona ni Kirat. Napeklan a mannugal, mammartek ken mammapatay. Tallon ti pinatayna. Pagbutbutngan iti lugarda a Lapulapu.

Apay a naglibas ni Kirat? immapay iti panunot ni Jessie. Kayatna ti agibales ken ni Alias Diango gapu iti panangliput daytoy kenkuana? Wenno nadamagna kadin a makikabkabit ni baketna?

Daldaliasatenen ti mobile patrol ti Jose Singson Avenue idi naguni manen ti transmitter.

“Mobile car 17… mobile car 17… do you hear me?”

“We hear you loud and clear,” insungbat ni Jessie.

“We have just received a complaint from a certain Mila Arce of 121 Baluarte, Salindeg. Hinold-ap kano ti natayag, nabaked ken napugot a lalaki a nagtagiarmas iti cal. 45. The description fits Kirat!”

Imbuelta ni Patrolman Roxas ti lugan. Pimmegges ti panagpatarayna idi makadap-aw ti patrol car iti national highway. Nagpakannawanda ket inunorda ti Baluarte. Iti nagkurusan, pinaginayad ni Melvin ti lugan sana insardeng iti sanguanan ti maysa a bungalow a nagtaginumero iti 121.

Nagtimreda. Madamdama, inlua ti ridaw ti babai a nakapantalon iti maong ken nakaaruat iti nakipet a tisirt.

“Dakayo ni Mila Arce?” sinaludsod ni Jessie. “Sika ti nagtelepono iti polis gapu ta nahold-apka?”

“Wen, sir,” insungbat ni Mila Arce sana pinastrek dagiti dua. Inwaras ni Jessie ti panagkitana iti salas. Nupay simple dagiti alikamen, nadalusda.

Inruarna ti kuadernona ket rinugianna ti nagsaludsod.

Kagapgapu ni Mila Arce a nakitienda iti downtown. Naglugan iti traysikel a nagawid. Maymaysana a pasahero. Iti nagsulian ti dalan iti labes ti arko a kumamang iti Salindeg, kellaat a nagbalangan ti maysa a lalaki sana tinutokan ti drayber. Inakas ti hold-aper ti napasadaan ti drayber ken ti kuarta ni Mila Arce a nasurok a dua a gasut a pisos. Pinadissaag ti hold-aper ti drayber ket intarayna ti traysikel. Ti kalsada a kumamang iti lumaud a barangay ti tinurong ti lugan.

“Nailangaam ti hold-aper?”

“Natayag, nabaked ken napugot. Kulot ti buokna. Adda bigotena. Agtawen siguro iti treinta.”

Nagtungtung-ed ni Jessie. Ni Kirat nga agpayso. Ti sal-at, naghold-ap tapno adda gastuenna? Ngem sadino ti papananna?

Awan timtimek da Jessie bayat ti panagsublida iti siudad. Pagammuan, nagkatek ta adda simmiplot iti isipna. Inruarna ti mapa ket inadalna.

Immuna a nasaripatpatan ni Boy Kimat iti Tamag Village sa iti labes ti arko a kumamang iti Salindeg. Agpalaud met ti direksion ti intarayna a traysikel.

Kaparanget a barangay ti Salindeg ti lugar da Alias Diango!

Immawag ni Jessie iti presinto. Imbagana ti suspetsana. Impasingked ti hepeda a mangibaon iti dua a polis nga agsiim iti lugar da Alias Diango.

Immaweng ti sirena a mangipakdaar iti alas dose. Inyawis ni Jessie ti panangaldawda ken ni Melvin sana intudo ti restaurant iti abay ti University of Northern Philippines.

Impaigid ni Melvin ti lugan. Simrekda. Nagorderda iti pangngaldaw.

Dida pay napudotan ti tugawda idi makangegda iti sirena. Aggilapgilap ti nalabaga a silaw ti police car a limmabas.

Rimmuar ni Jessie. Agwengwengweng ti transmitter.

“Proceed to Raois immediately. It seems Boy Kimat has struck again. This time, he has killed a woman!”

Saanen nga intuloy da Jessie ti nangan. Imbatina lattan ti pagbayadda iti lamisaan. Madamdama pay, un-unorendan ti Quirino Boulevard. Nagpadayada. Linabsanda ti San Julian, sa ti Nagsangalan ken Rugsuanan.

Madamdama, masungaddan dagiti dua a nakaparada a patrol car.

Imparada ni Fred ti lugan iti likudan ti police car. Dimsaag ni Jessie. Impalawlawna ti panagkitana. Panakkelen ti dua kadsaaran a balay. Nalawa ti paraangan a linakub ti konkreto nga alad. Adayo iti kaarruba.

Immunegda. Sinabat ida ti maysa a polis.

“Adda ti bangkay iti abay ti agdan, sir,” kinuna ti polis kalpasan ti panagsaludona.

Nagtalimudok ti panagkita ni Jessie iti bangkay a naidalutaytay iti arsadanan ti agdan. Mangrugin nga agbalay ti dara a nangsellep iti puraw a blusana.

“Ginarawyo ti bangkay?” inamad ni Jessie iti polis.

“Saan, sir.”

“Nangayabkayon iti retratista?”

“Addan iti dalan, sir.”

Tinaldiapan ni Jessie ti nakadumog a lalaki iti sopa. Naammuanna nga isu ti asawa ti napaltogan. Mario Corpuz ti naganna. Nabaneg. Adda pamuyaanna. Agtawen iti tallopulo. Kahero iti maysa a nalatak a kompania iti siudad.

Inruar ni Jessie ti kuadernona sana pinagsaludsodan ni ni Mario Corpuz.

Kaaw-awid ni Corpuz manipud iti opisina. Nadatnganna ti bangkay ti asawana. Nakangeg iti danapidip iti likudan. Ngem naladawen ta adda nangpalek kenkuana. Sakbay a napukawna ti puotna, nadarimusmosanna ti likudan ti natayag, nabaked ken napugot a lalaki a nagtaray nga aglibas. Adda armasna a kuarentay singko.

Sinukimat ni Jessie ti sugat ni Corpuz. Saan a grabe ti sugat ket saan a kasapulan a mayospital daytoy.

“Ania ti oras itay sumangpetka ditoy balayyo?” inamad ni Jessie.

“Dandani alas dose siguro, sir.”

Tinaldiapan ni Jessie ti oras iti relona. Alas dose y media. Nagtungtung-ed. Alas dose idi mapanda mangan. Dida pay napudotan ti tugawda idi naguni ti transmitter. Duapulo a minutos sada dimmanon iti nakapasamakan ti krimen.

Nataldiapan ni Jessie ti nabuong a sarming ti tawa iti abay ti ridaw.

“Sigud kadi a buong ti sarming ti tawayo, Mr. Corpuz?” sinaludsod ni Jessie.

“Itay laeng, sarge. It’s obvious, saan kadi? Binurak ti suspetsa ti sarming tapno magaw-atna ti lettatan ti ridaw iti uneg. Ngem mabalin a nangeg ni baket ti panagkanikliing dagiti naburak a sarming ket immulog. Naglagaw siguro ti kriminal ket pinaltoganna ni baket.”

[ Adda tuloyna ]