Footer

Sinagrap dagiti OFWs a pannakaabuso: sugat iti kaunggan a narigat nga aglunit (Maudi a paset)

ITI daytoy a kinarigat ti panagbiag a kanayon a problematayo ti kuarta, no ditayo agabroad,… nagrigat!”

Daytoy ti kinuna ni Blessie Velasco, 30, addaan iti asawa ken dua nga anak, da Dayanara, 11, ken Rica May, 8, agnaed iti Calongbuyan, siudad ti Candon.

Naammuan ken ni Blessie a damona ti agtrabaho kas domestic helper iti sabali a pagilian ket dina ninamnama nga agbalin a kasla batibat dagiti napagtengna manipud kadagiti amona iti panagtrabahona a domestic helper iti Lebanon.

Abril 28, 2006 idi napan ni Blessie idiay Lebanon. Addaan iti dua nga anak ken agnaed idiay Beirut ti nagbalin nga amona. Dina ninamnama nga adda an-anayen ti ubing nga aywananna. No pakanen ken painumenna ti ubing ket babaen iti hose a nakakonekta iti agongna nga agdiretso iti tianna.

“Saanko a kaya daydiay, kasanon no adda mapasamak iti ubing?” kinuna ni Blessie bayat ti interbio kenkuana ti DZTP ken Tawid News Magasin. Malaksid iti panangaw-awirna iti daytoy nga ubing, agtrabaho pay iti balay.

Gapu iti kastoy a situasion, nagpaut laeng iti dua nga aldaw iti umuna nga amona. Kabsat met laeng ti amona ti immalisanna. Nakarkaro manen ti panagtrabahona: agriing iti alas sais iti bigat, ket agtrabaho agingga iti alas dies wenno alas onse ti rabii. Awan ti innapuy, dagiti sobra dagiti amona a taraon ti ipakanda kenkuana iti mamindua iti makalawas.

“Adda la bassit kamalik iti trabahok, tungpaen wenno pungotennak ti amok a babai,” kinuna ni Blessie.

Ginesdan pay dagiti amona a tumawag iti telepono iti pamiliana iti maminsan laeng iti kada bulan.

Kinuna ni Blessie a nagpatulong kadagiti padana nga OFW sadiay. Nakisarita kadakuada babaen ti senias. Nangaramid iti suratna sana imbato iti ground floor iti alas sais ti bigat. Pinidut ti padana a Pinay ti surat ket isun ti nangi-text iti pamiliana iti Filipinas.

“Maanusak koma uray nadagsen a trabaho ngem diak kabaelan ti panangkabilda ken saanda a panangpakan kaniak,” kinuna ni Blessie.

Naglibas ni Blessie iti amona idi Hunio 4 daytoy a tawen babaen ti tulong dagiti padana a Pinay. Nagpaing iti embahada ti pagilian iti Beirut.

Kunana no nalusotannan ti problemana. Ngem gapu kano iti dina panangsurot iti kontratana, kasapulan nga agbayad iti $1,500 ken plane ticket no dina kayat ti mabalud iti imigrasion ken makaawid ditoy Pilipinas.

Nagtext pay ti rekruiterna iti adingna nga agipaw-it iti $485 a para plane ticketna a maiturong iti Lebanese nga asawa ti recruiter ngem saanna nga inanamongan. Pinilit pay ti ahensia nga agsukat iti amona. Dina intuloy ta imballakad ti maysa a padana a Pinay a saanen nga agsubli pay iti ahensia amangan no adda dakes a mapasamak kenkuana.

“No saan koma a bimtak ti gubat, amangan no nakabaludak ita,” kinunana ni Blessie.

Kinunana a narigat ti kasasaadda idi bimtak ti gubat. Masansan ti panagalarma ti sirena ti police station ket kumkumpesda iti buteng. Idi kimmaro ti situasion, pimmanawda iti embassy ket nagpaknida iti maysa a simbaan. Idi damo, nasurokda laeng a sangagasut ngem di mabayag, nagdadarison dagiti nagpaing a kadaraanna iti simbaan.

Nairaman ni Blessie iti first batch a naggawid ta nagbalin a prioridad a mapaggawid dagiti naggapu iti embassy.

Kinuna ni Blessie nga aganay a 18 oras ti panagbiaheda manipud Beirut agingga iti Damascus. Nailawlaw pay ti bus a naglugananda ta malaksid nga awan ti kinarelibo ti agmaneho, nairana nga adda bimtak a bomba iti asideg ti Syria. Dida nangnangan ket no adda man ipaunegda, saan nga innapuy.

Kinunana a nagbayagda iti asideg ti border ta sumagmamano a kaduana a Pinay ti napukawan iti travel document ket kapilitan a nagsublida tapno mangalada iti Beirut. Aglima orasda a nagur-uray iti border ti Syria.

“Uray badok laeng koma a naiyawidko,” kinuna ni Blessie.

Kinunana a dina kayaten ti agsubli iti Lebanon. Nupay kasta, kayatna pay ti agtrabaho iti sabali a pagilian.