Footer

Taep, pagkuartaan!

ADDA baro a programa nga iyad-adal ita dagiti taga-Agrikultura iti probinsia: ti taep a problema idi dagiti adda pagkiskisanna, ngem itan, dakkel a kuarta ti ipaayna. Daytoy ti naammuan kabayatan ti pannakiuman-uman toy nagsurat ken ni Alfonso Mendoza, provincial high-value commercial crops coordinator iti provincial agriculture office.

Kinunana nga adda programa ti opisinana a carbonized rice haul wenno daytay inuging a taep tapno maaramat dagiti mannalon wenno ilakoda tapno adda nayon a livelihoodda.

“Napintas ngamin nga abuno ti inuging a taep. Maysa daytoy a soil conditioner a no ammo laeng koma nga aramaten dagiti mannalon, saandan nga agproblema pay iti kinangato ti presio dagiti commercial nga abuno,” kinuna ni Mendoza bayat iti interbio kenkuana.

Dakkel pay a kantidad ti iyegna nangruna no mailako daytoy kadagiti aggatgatang iti inuging a taep a kunana a mailaklakon iti sabali a pagilian. Dakkel a kuarta para kadagiti makaammo iti wagas iti panangaramid iti uging a taep. Kangrunaan met laeng ngamin daytoy a maar-aramat nga abuno kadagiti gumatgatang nga adda iti ballasiw-taaw.

Kinuna pay ni Mendoza a malaksid a malako ti taep ken maaramat kas abuno, napintas pay a pagluto. Ken kangrunaan iti amin, maar-aramat daytoy a kas maysa nga ingrediente iti agas.

“No maammuan dagitoy dagiti tattao, sigurado a pagiinnagawandanton dagiti taep iti pagkiskisan, saan ket a pagproblemaan no sadino ti pagibellengan,” kinunana pay.

Comments are closed.