Footer

Ti kur-itan, kurditan, ortograpia, ortografia (Umuna a paset)

WEN, idi pay laeng koma a kayatko a suraten daytoy ngem naituntungkua. Saan, saanak a mangited iti suhestion no di ket saritaek laeng dagiti nakunada. Adda latta met rason iti tunggal sangaduyog a singasing no di man sangabandehado nga argumento. Karbenganda met iti madengngeg. Adda ti pangngeddeng kadagiti ima ti tunggal maysa no umayon wenno saan. Saanka a biangan iti pangngeddengmo. Umanayen kaniak a naisuratko dagitoy.

Dayta ti puntok iti makuna da Nid, Arsenio ken Joel.

Asinoda, kunam?

Ni Nid Anima, mannurat a taga-Abra.

Arsenio Salvador, mannurat a taga-Pangasinan.

Joel Manuel a taga-Ilocos Norte.

Isuda ti kayatko a sawen.

Ngamin, addaanda iti sangsangkamaysa a kapanunotan nupay nagdudumada iti bersion ken interpretasion, rason ken panangimutektek.

NI NID ANIMA KEN TI ILOCO’S DEFILEMENT

Rewind. Agsublitayo iti napalabas. Abril 7, 1990. Seminar Workshop ti GUMIL La Union a naangay a mismo iti Diego Silang Hall ti provincial capitol.

Iti dayta a seminar workshop idiay La Union, kinuestionaran ni Nid Anima ti ortograpia.  Imbaga ni Nid a nasaysayaat nga usaren ti sigud nga ortograpia a pakaaramatan dagiti letra “C”, ken dadduma pay. Ortograpia a kas iti “surat dagiti lallakay ken babbaket” a termino met ni apong Cles Rambaud. Adda pay ti letter “Q” ken “QUE” ken “GUI” ken dadduma pay.

Ni (daydi) apo Pelagio Alcantara ti nangsungbat kadagiti amin a saludsod, singasing ken argumento ni apo Nid. No nakangangakami a dimngeg, dagiti laeng mata ken isem da apo Juan S. P. Hidalgo, Jr. ken apo Gobernador Justo C. Orros ti agsarsarita.

Wen, masdaawak met kadagidi. Apay a nabaliwan ngay ti ortograpia? No agbasaak iti Bannawag idi ket adda pay laeng dagiti letra “C” ken “QUE” ken “GUI” ken dadduma pay.

Ngem ania ti makunak no di dimngeg a nagnganga ta “nganga” ngarud datao a mannurat idi, hehehe!

Sinolo da apo Pel ken Nid ti nagdiskusion kadaydi a malem maipapan dayta nasukatan nga ortograpia.

[ Adda tuloyna ]