Footer

Umad-adu, agsakit iti dengue fever

CANDON CITY – Immaboten iti 46 nga ubbing dagiti nabiktima ti dengue virus iti daytoy a siudad, ket posible nga umadu pay.

Daytoy ti naammuan iti interbio ti DZTP Radio Tirad Pass ken Tawid News Magasin ken ni Angie Rubang, agdama a sanitary inspector iti City Health Office ditoy.

“Pagsayaatanna laeng ta nasigud a napakaptan iti agas dagiti nakapet iti dengue ket saanda a kimmaro,” kinunana ni Rubang.

Impalgak ni Rubang nga agtultuloy ti panagpasuyokda kadagiti nadumaduma a barangay iti siudad tapno maliklikan ti ad-adu pay a mabiktima ti lamok nga addaan iti virus a dengue.

Kinunana a nalpasdan ti nagiwayat iti fogging operation kadagiti nadumaduma a pagadalan iti siudad.

Mainaig iti daytoy, kiniddaw ti city health office ditoy ti pannakailaltang iti pundo tapno paggatang kadagiti kemikal a maaramat iti fogging operation.

Kinuna ni Rubang nga intultuloyda met ti agisaysayangkat iti information dissemination kadagiti kakailianda nangruna iti panagdaldalus tapno makatulongda iti pannakalapped iti panagraira iti dengue fever.

“Ti panagdaldalus pay laeng ti maysa a kasamayan a panangpaksiat iti panagadu ti lamok, gapuna a daytoy met laeng ti kangrunaan nga iyunay-unaymi nga aramiden dagiti kakailian ditoy Candon City,” kinuna ni Rubang.