Footer

Balo wenno ni Baro (Maudi a paset)

PRINSESA TI BUKANEGAN

Diak latta kayat dayta a balo
Diak a mairusok nga ayaten nga agpayso
Isu a dimon ipapilit iti kayatko
Ta bagik ti bagik siak a mismo

PRINSESA TI BUKANEGAN

Diak latta kayat dayta a balo
Diak a mairusok nga ayaten nga agpayso
Isu a dimon ipapilit iti kayatko
Ta bagik ti bagik siak a mismo

PRINSIPE TI BUKANEGAN

Ti saritaan ket dimo koma lissian
Ti panangasawam iti baro nga aramidna iti kalokoan
Ket aramid met dayta a kaampangan
Agpanunotka koma, kadangadang

PRINSESA TI BUKANEGAN

Nakapiliakon, isu dayta baro
Diak kayat dayta a balo

PRINSIPE TI BUKANEGAN

Ti saan a dumngeg iti patigmaan
Rigrigat iti biag innanto malak-am
Ngem no sika iti agpanunot iti nasayaat
Biagmonto iti nakamaymayat

PRINSESA TI BUKANEGAN

Saanen a mabalbaliwan pay pangngeddengko
No diak kayat dayta balo no kunak, daytan pangngeddengko

PRINSIPE TI BUKANEGAN

No iti balo ti pakiaasawaam
Naragsakkanto iti dennana awan ti pagkunaam
Ta ti tao a nasingpet ken nagaget
Awan iti aldawna a narupanget

Ngem no ti baro nga awan ti ammona
Lang-ay laeng ammona ket para laeng iti bagina
Kakaasikanto nga ingganat-inggana
Isu a kasalisalko agpanunotka koma
Uray no sekenhan no naamnut ken nalagda
Natibay ti panagayatna ket kukuam a maymaysa

Saan a kas dayta baro a palikero
Adu a babai iti ayatna kainnagawmo
No isu ti pakiaasawaam sikan iti simrek iti kalbario
Isu a nasaysayaat la koman a nagbalasangka nga agpayso
Ta nasimsimbeng met laeng ti panagbiagmo

MANGITURTURONG

Dagita man gagayyemi ken papagayammi idan
Nangegantayo ti kapanunotanda kamamayatan
Ket sakbay ngarud nga intay ida husgaan
Denggentay man pay ti tokar ti Kailokoan

MUSIC: Ilocano Song

THEN:

Ti panagasawan ket saan a barengbareng
Nasken a panunoten amin a maiparbeng
Ti ugali ket maysa kadagiti kangrunaan a maiparbeng
Maud-udi dayta langa tapno isip ti nasimsimbeng

Uray no balo nga addaan anak no nagaget
Santo pay degdegan met iti inna kinasingpet
Ti ugalina ket pudno a pagwadan
Kangrunaan dayta a pagpilian

Ta ti maysa a pamilia ket addaan ti tunos
Agtaud amin dayta iti ayat ken urnos
Uray no guapo ti asawam no luam ket inaldaw nga agarubos
Wenno ti kanen dagiti annakmo ket nakapulpulos
Saanen a maiparbeng dayta a panagbiag
Isu a kamayatan amin nga asawa ti nasalukag

Dagiti ublag ket damona laeng dayta
Ngem inton agbayag ket umapaldan kenka
Ta nakasarakka iti lalaki nga ulidan
Iti pamiliana, ayatenna dina baybay-an

Ngarud, gagayyem ken papagayamko ida
Itoy a labanan ammoyo ngatan iti innak ayunan
Kaykayatko ti balo a ta manakman
Ngarud, ti prinsipe ti bukanegan intay palakpakan!

MUSIC: Ilocano song

Comments are closed.