Footer

Konsehal, kiniddawna iti NHI a maatur ti historical marker ti Vigan Cathedral

VIGAN CITY – Saan a naipatakder ti Katedral ti Vigan idi 1641 kas impakdaar ti Philippine Historical Committee ket kasapulan a maatur.

Daytoy ti linaon ti Resolution No. 06-50 nga indatag ni Konsehal Everin Molina  ken nangkiddawanna iti National Historical Institute (NHI) iti panangaturna iti nailanad iti historical marker iti sanguanan ti Vigan Cathedral a maaw-awagan pay ti Katedral ni San Pablo. Inaprobaran ti konseho iti 3rd ken final reading ti resolusion iti sessionda itay Setiembre 4.

VIGAN CITY – Saan a naipatakder ti Katedral ti Vigan idi 1641 kas impakdaar ti Philippine Historical Committee ket kasapulan a maatur.

Daytoy ti linaon ti Resolution No. 06-50 nga indatag ni Konsehal Everin Molina  ken nangkiddawanna iti National Historical Institute (NHI) iti panangaturna iti nailanad iti historical marker iti sanguanan ti Vigan Cathedral a maaw-awagan pay ti Katedral ni San Pablo. Inaprobaran ti konseho iti 3rd ken final reading ti resolusion iti sessionda itay Setiembre 4.

Kinuna ni Konsehal Molina a kas maibasar iti panagadal nga insayangkat ni Fr. Frederich Scharpf, SVD, saan a naipatakder ti Vigan Cathedral idi 1641 no di ket idi 1790 idinto nga indagadagna ti pannakakorehir ti historical marker a naikabit iti sikigan ti akinlaud a ridaw ti simbaan.

Linaon ti historical marker a “naipatakder idi 1641, nagbalin daytoy a simbaan a katedral idi naiyalis ti tugaw ti dioses ti Nueva Segovia manipud Lallo, Cagayan iti Vigan idi 1758, sinakup dagiti rebulosionario iti babaen ni Col. Juan Villamor idi 1898 ken dagiti puersa dagiti Amerikano iti babaen ni Lt. Col. James Parker idi 1899.”

Nailanad pay iti marker a “naipatakder iti daytoy a lugar ti Katedral… babaen ti bilin ni Juan Salcedo, ti Conquistador ken Founder ti Villa Fernandina nga immuna nga awag ti Vigan, dinadael ti ginggined idi 1619 ken 1627 ken babaen ti uram idi 1739.”

Kiddawen pay ti nasao a resolusion ti tulong ti National Museum a mangberipika iti natakuatan a rebba ti mapapati nga orihinal a simbaan a parokia ti Vigan a segun iti maysa a lokal a historiador, masarakan iti igid ti Karayan Mestizo iti sitio Cota (Barangay 9 itan), asideg ti Cabalangegan, Vigan.

Iti interbio kenkuana iti programa a Konseho ti Vigan a pagpapaayan ni Vice Mayor Franz Ranches a host, kinuna ni Molina a 10 a tawen kalpasan ti panangidekrito ni King Ferdinand VI idi Septiembre 7, 1758 a mangiyalis iti Episcopal See iti Vigan ken pannakaingato ti estado ti Vigan manipud iti pueblo (ili) iti Ciudad Villa Fernandina, saan pay a naipatakder ti agdama a Vigan Cathedral.

Kinunana a segun iti panangadal ni Scharpf a naibasar kadagiti orihinal a dokumento a nagtaud manipud iti Archivo General de Indies iti Seville, uray idi nagtakem ni Fr. Miguel Garcia nga obispo ti Nueva Segovia idi 1767, nadakamat ti obispo nga “awan ti pudno a Katedral, wenno pudno nga episcopal residence (palacio) a para kenkuana ken iti administrasionna,” ket kasapulan a “nangipatulod ti naan-anay a dokumentado a surat iti ari a nangibagaanna kadagitoy dua a nangruna a kasapulan ti dioses.”

Segun pay iti panagadal ni Scharpf, inted ti Espania iti pammalubos ken tulong para iti pannakaipatakder ti simbaan ngem iti “kondision a masapul a mapili a naannad ti lugar a pakaipatakderanna ken babaen ti kooperasion ti gobierno sibil…”

Nadakamat pay iti panagadal nga uray idi sinuktan ni Bishop Juan Ruiz de San Agustin, ORA, ni Garcia idi 1782, “awan pay ti pagnaedan ti obispo wenno disente a Katedral” ket immuna nga inaramidna ti pannakaipatakder ti palasio.”

Segun pay iti nasao a panagadal, idi 1785, binisita ni Don Jose Basco y Vargas, ti Kapitan Heneral ken Vice Patron ti Vigan, ket inaramat ni Ruiz daytoy a gundaway a nangipakita kenkuana ti daan a simbaan tapno makumbinsina a kasapulan ti baro a pasdek.

Kinuna ti resolusion a nailugar dagiti panuli a bato (cornerstone) ti agdama a Vigan Cathedral idi Enero 31, 1790 ket kalpasan ti uppat a tawen a nalpas dagiti diding…”

“… Nalawag a ti historical marker ti Vigan Cathedral a nagkuna a naipatakder daytoy idi 1641… saanna a dakamaten ti agdama a pasdek ti Vigan Cathedral,” kinuna ni Molina idinto nga innayonna nga “agparparang a saan nga orihinal a lugar ti Vigan parish church ti agdama a Vigan Cathedral no di ket masarakan iti malaylayus a lugar iti nababa a sitio a maawagan Cota.”

“Maibatay kadagiti dokumento, archival reasearch ken oral history, dagitoy ti pagibasaran a mangberipika iti maysa a banag. Ti panagkunak, napateg pay laeng daytoy… maadal ken maapresiar ken ipategtayo ti siudadtayo,” kinuna ni Molina.