Footer

Naglibas ni Boy Kimat! (Maikadua a paset)

SAAN a nagtimek ni Jessie. Rimmuar iti balay.

Nabayag a minulenglenganna ti buong a tawa a kasla adda birbirokenna. Idi mapnek, nagparintuod sana inamiris dagiti buong a sarming. Naiwara dagiti sumagmamano a dadakkel a buong ti sarming iti ruar ti paladpad ti tawa idinto a naidarnap dagiti babassit a sarming iti sementado a dalan nga agtunged iti kalsada.

SAAN a nagtimek ni Jessie. Rimmuar iti balay.

Nabayag a minulenglenganna ti buong a tawa a kasla adda birbirokenna. Idi mapnek, nagparintuod sana inamiris dagiti buong a sarming. Naiwara dagiti sumagmamano a dadakkel a buong ti sarming iti ruar ti paladpad ti tawa idinto a naidarnap dagiti babassit a sarming iti sementado a dalan nga agtunged iti kalsada.

Madamdama, nagsubli met laeng iti uneg.

“Adda kadi nadlawmo a natakaw?” pinerrengna ni Corpuz.

“Awan met, sir,” kinuna ni Corpuz. “Nalabit napabutngan ni Boy Kimat ket dinan intuloy ti panggepna.”

“Am-ammom kadi ni Boy Kimat?”

“Saan. Ngem nabasak iti Tawid News Magasin ti panangpatayna iti taxi driver a hinold-apda a puon ti nakaibaludanna.”

“Ania ti pagsapulan ni baketmo?”

“Aglaklako iti bagas. Adda puestona iti Mayor Titong Singson Commercial Com-plex.”

“Adda kadi posibilidadna nga am-ammo ni baketmo ni Boy Kimat?”

“Diak masiguro. Negosiante ni baket ket mabalin a kustomerna ni Boy Kimat wenno ni baketna.”

“Kasano ti pannakaammom nga adda asawa ni Boy Kimat?”

“Ow, shucks, nasken kadi a pagsaludsodannak no adda asawa ni Boy Kimat wenno awan?”

“Sungbatam ti saludsodko, Mr. Corpuz!”

“Idi makedngan a mabalud, naidiaryo ti asawana ken ti dua nga annakna. Mapnekkan, sir? Masaludsodko man, ania ti koneksionna iti pannakapapapatay ni baketko?”

“Just routine questions, Mr. Corpuz,” kinuna ni Jessie. “Kitkitaenmi amin a posibilidad.”

“No awanen ti sabali pay a saludsodem…”

“Nakaseguro kadi ni baketmo?” kellaat a sinaludsod ni Jessie. Pinerrengna ni Corpuz.

“Apay a saludsodem dayta? Maysaak kadi a suspetsa?”

“Kas nakunak, routine question, Mr. Corpuz. Dika koma gumura. I want to know all the details.”

“Nakaseguro ni baketko iti P500,000.”

“Kaano a nangrugi?”

“Tallo a bulanen.”

“Sika ti nainaganan nga umawat iti benepisio?”

“Wen. Ngem daytoy ti ipasingkedko kenka. I love my wife! Are you satisfied?” immirteng ti rupa ni Mario Corpuz. “

Nagtung-ed ni Jessie.

IMPARADA ni Jessie ti mobile car iti sanguanan ti presinto. Agsagsagawisiw nga immuneg iti opisinada. Kinermanna ni PO3 Adriatico a duty iti dayta nga aldaw.

“Any lead ken ni Boy Kimat?” sinaludsod ni Jessie ken ni PO4 Andy Rebunal, ti inbestigador ti kaso.

“Nasarakanda ti traysikel nga intaray ni Boy Kimat iti sanguanan ti maysa a tienda iti Paratong, sir,” kinuna ni Rebunal.

“Naalaanyo iti fingerprints ti lugan?”

“Wen, sir. Positive a ni Boy Kimat ti nangitaray iti lugan.”

“Ania pay ti naduktalanyo?”

“Maysa a babai nga agnagan iti Adelina Almachar ti nagreklamo nga adda nangkallong iti tinuno a paltat ken kilabbanda nga innapuy, ken natakaw ti bado ken pantalon ni lakayna iti balaybayanda nga adda iti likudan ti balayda.”

“Ania nga oras ti pannakaduktal ni Almachar a napukaw dagiti aruaten ni lakayna?”

“Itay agsapa, sir. Iti panagimbestigami, kinuna ni Marcos dela Cruz a kaarrubada nga idi mapan umisbo iti agarup alas kuatro ti parbangon, adda nakitana a lalaki a naggapu iti inaladan da Almachar. Iti deskripsion nga intedna, awan duadua a ni Kirat.”

“Sadino ti nakapasamakan ti insidente?”

“Iti nagbeddengan ti San Pedro ken Mindoro, sir.”

Nagkuretret ti muging ni Jessie. Timmakder iti tugawna ket napan iti opisina ti administrative officer. Adda nakabitin a naipadakkel a mapa ti siudad iti nasao nga opisina. Nabayag a minatmatanna ti mapa ti siudad.

Bimmaba met laeng. Saanen a nagsubli iti opisina. Sineniasanna ni Melvin a rummuarda.

“Mapanta agrekorida iti Lapulapu, Melvin,” kinuna ni Jessie.

“Iti baluarte ni Boy Kimat?” kinuna ni Melvin. “No siak ni Kimat, diak tumammidaw iti Lapulapu.”

“Apay a kasta ti makunam?”

“Bosing naman, siempre iti Lapulapu ti umuna a pagsiiman dagiti polis agsipud ta adda dita ti pamiliana.”

“Dayta ti magustuak kenka, Melvin, ta ammom nga usaren ti utekmo,” nagkatawa ni Jessie. “Ngem nagbiddutka. Sabali ti gagarata. Lumabasta laeng iti Lapulapu.”

“Asino, boss?”

“Maammuamto.”

Madamdama, un-unorendan ti Calungboyan. Iti umabagatan, naungor ti baybay.

Masungaddan ti Lapulapu. Iti akikid a kalsada, tumuyutoy dagiti aggaayam nga ubing. No saan a nagbusina iti nagsasaruno ni Melvin, dida pay koma agpaigid.

Linabsanda ti pagtaengan ni Boy Kimat. Agkupasen ti maris-duyaw a pinta ti dua kadsaaran a balay. Nakaserra dagiti amin a bintana. Sigurado a naammuanen ti pamilia ni Boy Kimat a naglibas daytoy iti pagbaludan.

Pinaisardeng ni Jessie ti lugan iti labes ti maysa a bassit a tienda. Nagsenias. Madamdama, immasideg ni PO3 Alibin. Nakasibilian daytoy. Isu ti imbaon ti hepeda nga agsiim iti purok da Boy Kimat.

“Apay a nakarikep ti balay da Boy Kimat?” inamad ni Jessie. “Nagpaknida?”

“Wen, sir. Damagko a napanda nagpaing iti Nagsarmingan. Mabalin a nagamak da Ditas a balsen ni Boy Kimat. Ammo la ketdin ni Boy Kimat a makikabkabit ni baketna. Daytoy ti suspetsa dagiti kapurokanna ditoy a nakapatpatangko.”

Nagtungtung-ed ni Jessie. Maysa laeng dayta nga anggulo no apay a naglibas ni Boy Kimat. Ngem ad-adda a mamati a ni Alias Diango ti puntiria ni Boy Kimat gapu iti panangliput daytoy kenkuana. Gapu iti panagbalinna nga state witness, nakalusot ni Alias Diango iti kasona. Iti naudi a damag ni Jessie, ni Diango ti akin-iggem iti huetengan iti tallo a barangay a pakaibilangan ti Lapulapu.

“Okey, papanantan, Boss?” inamad ni Melvin.

“Dumagasta iti Barangay Tres,” kinuna ni Jessie.

“Nasapa pay, Boss,” nagrungiit ni Melvin.

“Police business, not pleasure, Melvin,” naisurot ni Jessie a nagkatawa.

Pinanurnor ti lugan ti Reyno Street. Nalamiisen ti puyupoy nga ibelbel-a ti baybay. Mangrugin a rumasay dagiti balbalay.

Impaigid ni Melvin ti patrol car iti sanguanan ti maysa a bungalow. Iti sikigan ti balay, nakabitin a kasla banbanteng dagiti nadumaduma a pantalon a maong ken tisirt.

Immunegda iti paraangan. Nagtugtog ni Jessie iti nakatangep a ridaw.

Madamdama, nailukat ti ridaw. Nagkuretret ti muging ni Carla a nakakita kadakuada. Agtawen laeng ni Carla iti duapulo ket lima ngem mangrugin nga agkupas ti pintasna. Nakaputot iti nakiting. Madlaw nga awan ti tapar ti barukongna.

Iti labes ti ridaw, iti salas, madama ti panagtotong-it ti uppat a babbai. Maysa ti nakailad iti kayo a sopa nga agbasbasa iti komiks.

Agpapaay dagiti babbai iti Hot Stuff. Ni Carla ti manedierda.

“Ne, sumrekkayo, sir!” kinuna ni Carla. “Asino kadi ti masapulyo? Ibagayo latta!”

Nasiputan ni Jessie ti nalimed a panagrungiit ni Melvin.

“Adda ni Lily?” inamad ni Jessie.

“Saanen a ditoy ti paggigianan ni Lily, sir. Nabayagen nga immakar. Manipud nakasarak iti sugar daddyna, saanen a sumarsarungkar ditoy,” kinuna ni Carla.

Saan a nagtimek ni Jessie idinto nga inutobna ti implikasion ti sinao ni Carla.

Nadamag kadi met ni Boy Kimat nga addan sabali nga akin-iggem ken ni Lily? Naglibas ni Boy Kimat tapno balsenna ti kabitna?

[ Adda tuloyna ]