Footer

Nalamiis a reaksion opisial ti DepEd iti programa ti literacy ken numeracy, nalagidaw

VIGAN CITY – Linagidaw ni Konsehal Alfredo Figuerres, Jr., ti nalamiis a reaksion dagiti opisial ti Department of Education iti ordinansa mainaig iti reading literacy and numeracy program nga indatagna itay nabiit iti Sangguniang Panlungsod ditoy.

VIGAN CITY – Linagidaw ni Konsehal Alfredo Figuerres, Jr., ti nalamiis a reaksion dagiti opisial ti Department of Education iti ordinansa mainaig iti reading literacy and numeracy program nga indatagna itay nabiit iti Sangguniang Panlungsod ditoy.

Kinuna ni Figuerres a serioso ken sapasap a problema ti reading ken mathematics difficulty kadagiti agbasbasa iti publiko nga ubbing. Ket ti polisia ken panggep ti gobierno ti siudad ti mangipaay iti dekalidad a panagisuro kadagiti ubbing iti Division of City Schools ken mamagbalin kadagiti saan a makabasa nga ubbing iti Grade I a literado ken mapasayaat ti kabaelanda iti panagbasa ken matematika.

Panggep ti Ordinance No. 14 ti pannakaipasdek ti programa iti literacy ken numeracy tapno agbalin dagiti di makabasa nga agbasbasa iti umuna a tukad a literado ken mapadur-as ti kabaelan dagitoy nga ubbing nga agbasa ken agkuenta.

Kinuna ni Figuerres a sumagmamano a pagadalan iti siudad ti Vigan ti nangadaptar iti “Reading Literacy and Numeracy Extension Program ti University of Northern Philippines (UNP) babaen ti memorandum of agreement iti nagbaetan ti DepEd Division of City Schools ditoy ken ti UNP idi Oktubre, 2005.

Resipiente iti programa ti Nagsangalan Elem. School ken Rugsuanan-Purok Elem. School (SY 2004-2005), ken Raois Elem. School, San Julian Elem. School ken Salindeg Elem. School (SY 2005-2006).

Ngem iti position paper nga indatag ti Division of City Schools babaen ken ni Dr. Rosalino P. Javier, Asst. Schools Div. Supt. OIC, kinunana nga addan dagiti programa nga inrusat ti DepEd a pangidur-as iti kabaelan dagiti agbasbasa nga ubbing iti panagbasa, panagsurat ken iti numero kas iti programa ti Every Child a Reader Program (ECARP), Bright Minds Read (BMR), Learning Enhancement Program of the Philippine Science High School, MTAP, ETV, kasta met dagiti programa/proyekto nga inrusat ti dibision para iti panagdur-as dagiti mangisursuro ken iti kurikulum.

Segun iti position paper ti Division of City Schools of Vigan, nupay laudable ti programa ti literacy ti UNP adda dagiti maikonsidera a punto kadagiti di-makabasa ken nakapsut nga agbasa iti umuna ken maikadua a grado kas iti no addaan met laeng ti mangisursuro iti kasapulan nga skills ken tekniko nga agisuro kadagiti di-makabasa ken nakapsut nga agbasa iti umuna a grado,  kasta met a kasapulan iti adu a panawen ken naan-anay a panagpasensia.

Ngem iti report nga indatag ni Dr. Ocaina B. Figuerres, Dean ti Continuing Teacher Education ken project director ti Reading Literacy and Numeracy Extension Program ti UNP, impalgakna a natakuatan iti implementasion ti programa nga epektibo ti gannuat ket dimmakkel ti percentage mastery dagiti ubbing-kliente iti 57 porsiento agingga iti 100 porsiento iti panagbasa ken 76-100 porsiento iti matematika.

Inrekomenda ni Ocarna ti panagtuloy ti proyekto ken iti panagsolisit iti ahensia ti pundo para iti pannakaikalawa ti programa ken para iti nasaysayaat ken napasayud a pannakaited ti serbisio.

Ngem singasing ti DepEd Vigan City Division a no tarigagay ti city council ti mangilatang iti pundo a mangsuporta kadagiti programa ken proyekto a pang-edukasion, makikonsulta ken makikoordinar kadagiti opisial ti dibision sakbayna.

Nupay kasta, iti kaudian a session ti konseho, nagmaymaysa dagiti konsehal a nangpabor iti pannakaputar iti maysa nga ordinansa a mangipasdek iti nasao a programa ken mangilatang iti pundo iti daytoy.

Sagudayen ti ordinansa a mailatangan iti P300,000 iti tinawen a pangsuporta iti programa.