Footer

Naglibas ni Boy Kimat! (Maikatlo a paset)

KAHERA idi ni Lily iti Hot Stuff. Ditoy ti nagam-ammuanda ken ni Boy Kimat. Nakursonadaan ni Boy Kimat ni Lily ket kinabbalayna. Ngem idi nagkakaso ni Boy Kimat ken nasentensiaan, namonitor ni Jessie a nagsubli ni Lily ditoy dati a kaserana.

“No talaga a kursonadayo ni Lily, mabalintayo latta a paayaban,” inkidday ni Carla.

“Police, saan a foolish business daytoy!” insalingbat ni Melvin.

“Kaano pay?” sinaludsod ni Jessie a kasla dina nangeg ti pasagid ni Melvin.

“Dua a bulanen ti napalabas.”

“No awan ni Lily ditoy, apay a dimmagas ni Boy Kimat?” kellaat a sinaludsod ni Jessie.

“Kasano nga… di met adda iti pagbaludan ni Boy Kimat, sir?”

“Saankan nga agindidi. Adda feedback a ditoy ti nagtarusan ni Boy Kimat kalpasan a naglibas iti pagbaludan!” kinuna ni Jessie.  

“Saan a nagpakastoy, sir! Saan a husto ti nasagapyo nga impormasion! Ngem dakkel a desgrasia no maammuan ni Boy Kimat nga insukaten ni Lily!”

Sineniasan ni Jessie ti babai a nakailad iti sopa nga umasideg.

“Agsaoka iti pudno, ilemlemmengyo ni Boy Kimat ditoy, ania?”

“Ne, saan, sir,” naapput ti babai ti barukongna. “Dimi kayat ti mairamraman iti basol ni Boy Kimat, sir!”

“Ania ti adres ni Lily? Sino ti sugar daddyna?”

“Sori, sir,” kinuna ni Carla. “Diak ammo. Dina kayat nga ited ti baro nga adresna. Dimi met ammo ti sugar daddyna.”

“Diak kayat ti maul-ulbod, Carla!”

“Agpayso ti ibagbagak, sir!”

“No adda tipyo maipapan ken ni Boy Kimat ken ni Lily, tawagandak iti presinto,” kinuna ni Jessie.

Rimmuarda iti balay. Nagluganda iti patrol car.

Pinidut ni Jessie ti transmitter. Tinawaganna ni Supt. Magno, ti hepeda.

“Adda suspetsak nga umar-arubayan ni Boy Kimat iti lugar da Alias Diango, sir,” kinunana. “Kasapulan ti kaduatayo nga agsiput sadiay.”

TINANGAD  ni Jessie ti uppat a kadsaaran a pasdek. Kabarbaro ti pasdek ket pagopisinaan dagiti dadakkel a kompania ken korporasion. Agup-upa ti M and M Enterprises iti maikatlo a kadsaaran. Ditoy ti pagtrabtrabahuan ni Mario Corpuz a kas kahero.

Impitik ni Jessie ti sigariliona sakbay a bimmallasiw iti kalsada. Umis-isem a linugayan ti guardia. Am-ammo ni Jessie ni Dionie. Maysa kadagiti natultulonganna iti kallabes.

Tinalmeganna ti buton ti elebeytor. Madamdama, naglukat daytoy. Simrek sana intalmeg ti 3rd floor.

Sinabat ti nalamiis ken nabanglo nga angin apaman a nakadap-aw iti opisina ti M and M Enterprises.

“Adda maitulongmi, sir?” iniseman ti receptionist.

“Mabalin a kasaritak ni Mr. Vergara, ti manageryo?” kinuna ni Jessie.

Nagtelepono ti receptionist.

“Sumrekkayo kano, sir,” kinunana.

Timmakder ti manager apaman a nakastrek ni Jessie iti opisina.

“Anything I can do for you, sir?” inamad ni Mr. Vergara.

“Maipapan ken ni Mario Corpuz, Mr. Vergara. Just routine questions mainaig iti robbery attempt iti balayda.”

Nagtugaw ni Jessie. “Ania ti makunayo ken ni Mr. Corpuz kas empleado?” inamadna.

“Awan ti pamilawak kenkuana,” kinuna ni Mr. Vergara. “Mapagtalkan nga empleado.”

Adu pay dagiti sinalsaludsod ni Jessie maipapan ken ni Corpuz. Naammuanna a mannakitinnulong ken napasnek iti trabahona.  Napili a most efficient employee ti kompania idi kanikadua a tawen. Isu pay ti presidente ti unionda nga empleado.

Mabigbig a pamilia ti nakaikamanganna. Maraem iti gimong ken naikappeng ti asawana kadagiti nadumaduma a gunglo a tumultulong kadagiti marigrigat.

Kinuna ni Mr. Vergara nakalangenlangennan ti nagawan nga asawa ni Corpuz ket awan ti pamilawanna kenkuana.

“Ladawanda ti pagwadan nga agassawa,” kinuna ni Mr. Vergara.

Maysa laeng ti pagkurangan dagiti agassawa. Saanda a naparaburan iti anak iti sangapulo a tawen a panagdennada nga agassawa.

Nagyaman ni Jessie. Saanen a nagbayag.

Nagmattider iti labes ti ridaw sa nangdutdot iti sigarilio. Nalimed a sineniasanna ni Dionie.

Immasideg ni Dionie. Indiayaan ni Jessie iti sigarilio.

“Damagko a pilio ni Mario Corpuz iti babai,” kinuna ni Jessie. “Agpayso kadi?”

Nagtalangkiaw ti guardia. “Off the record koma daytoy, bossing,” kinunana iti nakapsut a timek. “Diak kayat ti maisarsarak.”

“Am-ammonak, Dionie. Nakaserra ti bibigko.”

“Adda maipalpalapayag kaniak, boss, nga adda pagpatpatayan ni Mr. Corpuz.  Agpapaay iti maysa a klub. Ngem diak ammo no ania a klub.”

“Ammom ti naganna?”

“Sori, sir. Sayangguseng laeng daytoy napidutko. Mabalin a saan a pudno.”

“No adda masaepmo, tawagannak, wen?” kinuna ni Jessie.

“Basta sika, bosing,” kinuna ni Dionie.

IMPITIK ni Jessie ti sigariliona iti ruar. Rimsik ti apuy iti kasipngetan. Maikatlon ti nasusopna a sigarilio.

Impasirna ti relona iti kasipngetan. Alas dosen ti ipalpalnaad ti agandap a relona.

Impalladaw ni Jessie ti panagkitana iti dua kadsaaran a balay. Awanen ti silaw iti akinngato a kadsaaran. Ti laeng bugbugtong a silaw iti ngatuen ti ridaw ti nakagangat. Nakaturogen da Alias Diango ken ti kaduana a babai?

Alas nuebe idi simmangpet ni Alias Diango. Intulod ti nangisit a kotse. Saan a bimmaba ti drayber. Ngem mailasin a nakainomda iti apagbiit a panagpatangda ken ni Diango.

Kasla alimatek ti babai a kimpet ken ni Alias Diango iti yuunegda iti inaladan. Dina nailangaan ta malaksid a pangadaywen ti yanna, ti laeng nakudrep a silaw iti nagkurusan ti nangsilnag kadakuada.

Saanen a rimmuar  dagiti dua iti balay. Naggapu ti babai iti klub? Nalatak ni Diango a rapas ti imana kadagiti babbai a masikkarud kadagiti videoke bar.

Napaliad ni Jessie idi mariparna ti anniniwan nga agakar-akar iti sapideng ti kongkreto nga alad. .

Sinidolna ni Melvin sana insungo ti anniniwan.

“Salikawkawam iti likudan,” imbilinna.

Timmawag ni Jessie iti presinto. Dimmawat iti back-up. Imbagana ti lugar a yanda.

Nagarudok ni Jessie a nangkamang iti puon ti mangga iti ruar ti inaladan idinto a di sininaan ti matana ti anniniwan  a simmapideng itan iti asideg ti ruangan.

Nagkul-ob ni Jessie idinto nga inurayna no ania ti sumaruno a tignay ti anniniwan.

Naganit-it iti apagapaman ti nailukat a landok a ruangan ti paraangan. Ngem awan ti naipasirna a simrek.

Nagpaliiw ni Jessie. Nagturongan ti anniniwan?

Ulimek. Panagrikna ni Jessie, nagsardeng ti panagpitik ti darikmat. Pinatademna ti panagkitana ken panagdengngegna. Inapirasna ti paltog iti siketna. Dina intaltalek dagiti sumanengseng a lamok.

Ni Boy Kimat ti datdatlag a sangaili? No isu, siguraduenna nga adda dakes a panggepna ken ni Alias Diango!

[ Adda tuloyna ]