Footer

Nasional a gobierno, kayatna nga ikkatan pundo ti Banaoang Pump Irrigation Project

CABUGAO, Ilocos Sur – Kinuna ni Vice Governor Deogracias Victor “DV” Savellano nga agbalin nga awan kaes-eskan ti Banaoang Pump Irrigation Project (BPIP) no ikkatan ti gobierno nasional ti naiprograma a pundona.

Daytoy ti reaksion ni Savellano bayat ti programa ni Danny Tajon a One-On-One a naipatangatang iti DWRS itay nabiit mainaig iti panggep ti national government a maikkatan iti P1 bilion ti pundo ti BPIP.

Kanaig daytoy, nangipasa ti provincial board iti resolusion a nangkiddawanda iti nasional a gobierno a saan a maikkatan ti P2.5 bilion a pundo ti BPIP.

Babaen daytoy a proyekto ni Dip. Salacnib Baterina ken ti gobierno probinsial ditoy, makunnot ti danum manipud iti Karayan Banaoang a manamnama a mangpasayak kadagiti kataltalonan dagiti sumagmamano nga ili iti umuna a distrito ti probinsia a pakaibilangan ti Bantay, San Ildefonso, Sto. Domingo ken Magsingal.

Napunduan daytoy a proyekto babaen ti pautang nga inted ti China ken counterpart a pundo manipud iti national government.

Impalgak ni Savellano a naammuanna a maikkatan ti pundo ti BPIP iti miting ti super region a naangay itay nabiit.

“Su a nagapelaak sadiay ket insingasingda nga agapelatayo met ditoy probinsia ta pagtitinnulongantayo amin,” kinuna ni Savellano idinto nga indagadagna kadagiti opisial ti probinsia ken dua a mangibagi iti distrito ti Ilocos Sur, da Diputado Salacnib Baterina ken Diputado Eric Singson, iti panagmaymaysada tapno di maikkatan ti pundo ti BPIP.

Impalgak ni Savellano a maysa laeng nga instruksion ken awan ti naibaga a rason no apay a maikkatan ti pundo ti proyekto.

“Ti BPIP ket nakausardan iti agarup P600 milion… dakkel pay ti magasto ta adayo pay ti sourcena ket no ikkatenda ti P1 bilion, di awanton ti mapan kadagiti kanal,” kinuna ti bise gobernador idinto nga inyunay-unayna nga “agbalin a useless ti proyekto no saanda nga iyimplimentar amin diay pundona.”

“…Adda met diay loan, adda met diay kuarta, apay a dida iyimplementar amin amin… apay a kissayanda iti P1 bilion?” kinuna pay ni Savellano sana innayon a no kissayanda ti pundo, dakkel ti epektona ket agbalin laeng ti nasao a proyekto a white elephant.

Kinuna ti bise gobernador a nagrigrigatan ni Dip. Baterina nga impagpagna, … “su a masapul (koma) amin amin a pundona, maiyimplementar met laeng tapno diay panggepna a dumanon iti Magsingal, makadanon met laeng.”

Inyunay-unay ni Savellano a prioridad ti resolusion a masapul a maaksionan a sigida.

Comments are closed.