Footer

P100,000 barangay budgetary aid, kinomentarioan ti mayor ti Vigan City

VIGAN CITY – Saan a veto no di komentario.

Daytoy ti panangilawlawag ni Mayor Ferdinand Medina mainaig iti ordinansa a mangingato iti tinawen a budgetary aid kadagiti barangay ditoy.

“We should prorate the needs of the barangay… no dakdakkel diay kasapulanna, dakdakkel ti maited (a pundo), no basbassit, basbassit ti maited a pundo,” kinuna ti mayor.

Inanamongan ti konseho ditoy itay nabiit ti pannakaited iti annual budgetary aid nga aggatad iti P100,000 kadagiti amin a barangay itoy a siudad.

Kas intuyang ti ordinansa a pinutar da Konsehal Everin Molina ken Kon. Hermenigildo Apelin, mailatang ti P100,000 iti tinawen kas budgetary aid kadagiti 39 a barbarangay iti siudad ti Vigan.

Ngem kinuna ni Medina nga adda dagiti dadakkel a barangay ti siudad ket dakdakkel ti kasapulanda a pundo idinto nga adda met dagiti babassit a barangay ket basbassit met ti pundo a masapulda.

“Ngamin, no ipadatayo ti maalada, there will come a time nga ag-suffer dagiti dadakkel a barangay,” kinuna ni Medina sana inyunay-unay a “masapul nga i-proratetayo ti masapulda a pundo manipud iti city government a maibatay iti kadakkel ti populasion ken land area ti barangay.”

Dinakamat ni Medina ti Barangay Mindoro a kasapulanna ti ad-adu a pundo agsipud ta nadadael ti seawall ti nasao a barangay ken dagiti dadduma a barangay a nalawlawa ti sakupda nga agkasapulan a masemento ti kalsadada ken makasapul iti gymnasium.

Impalgak ni Medina a nagpapatanganda kada Vice Mayor Franz Ranches ken dagiti miembro ti konseho ditoy daytoy a kapanunotan ti ehekutibo a mai-prorate ti pundo iti masanguanan a tawen kasta met nga amin a pakausaranda, magna iti babaen ti maaramid nga strategic planning.

“Agsagsagana manen ti city government babaen ti tulong ti barangay secretary ken empleado ti siudad a mangaramid iti strategic planning ket aniaman a prioridad a proyekto a rummuar, ditoy ti pakausaran ti pundo a maited kadagiti barangay,” kinuna ni Medina.

Kinuna pay ti mayor nga agtultuloy latta dagiti dadduma a pundo a mait-ited kadagiti barangay ta “amin a pundo, amin a development fund nga aganay a P14 milion, para kadagiti amin a taga-siudad ti Vigan.”

Comments are closed.