Footer

Saan a dengue ti impatay ti ubing – CHO

CANDON CITY – False alarm ti nagwaras a damag a natay gapu iti dengue virus ti maysa nga ubing iti barangay Darapidap.

Daytoy ti impakaammo ni Angie Rubang, agdama a sanitary inspector ti City Health Office kabayatan ti pannakiuman-uman kenkuana ti DZTP Radio Tirad Pass itay nabiit.

“Kinaagpaysona, naalarmakami idi nadamagmi nga adda kano natay gapu iti dengue iti Darapidap ngem iti panagsukisokmi, saan gayam a dengue ti puon ti nakatayan daytoy nga ubing no di meningitis,” panangilawlawag ni Rubang bayat iti interbio kenkuana.

Indagadag ni Rubang ti saan koma a panagalarma dagiti residente iti baet nga adu dagiti kaso ti dengue iti daytoy a siudad gapu ta isaysayangkat ti opisinana ti agtultuloy a panagmonitorda iti daytoy a sakit.

Iti agdama, addan 56 a kaso ti dengue iti daytoy a lugar idinto a 5 pay ti maob-obserba. Nupay kasta, kinuna ni Rubang nga awan met ti nakaro kadagiti nasao a kaso.

Kinuna ni Rubang a tapno maliklikan ti panagraira ti sakit a dengue, agtultuloy met ti panagpasuyok kadagiti pagadalan ken pagtaengan, agraman ti panangipaay iti residuals ken ti panagdaldalus dagiti bumarangay iti pagtaengan ken iti aglawlawda.

“Daytoy pay laeng ti kapintasan a wagas a panangpaksiat iti lamok,” kinuna ni Rubang.

Comments are closed.