Footer

Atong Ang, di kasapulanen nga agtestigo iti plunder trial ni Estrada – Gov. Singson

Napigsan dagiti ebidensia, kuna ti gobernador

KINUNA ni Gov. Luis “Chavit” Singson a saanen a kasapulan nga agtestigo ni Atong Ang iti plunder trial ni dati a Presidente Joseph Estrada agsipud ta napigsan dagiti ebidensia maikontra kenkuana.

“Idi pay, kanayon nga agawag ni Atong Ang toy numo toy biang ta kayatna ti agtestigo kontra ken ni Erap ta ibagana aminen ti kinapudno ngem kinunak, ‘saanka a masapulen ta agsobsobran dagiti testigo ken ebidensia,’” kinuna ni Singson bayat ti interbiona a naipatangatang iti dua a lokal nga estasion ti radio iti siudad ti Vigan.

Itay nabiit, imbilin ti maysa a US judge a maisubli ni Atong Ang iti Pilipinas.

Naglibas ni Atong Ang a pimmanaw iti pagilian idi mapadisi ni Estrada idi 2001 ket nagturong iti US.

Ni Singson ti nangibutaktak nga immawat ni Estrada iti kickback manipud iti bingay ti probinsia ti Ilocos Sur iti tobacco excise tax ken pasuksok manipud iti illegal a sugal a hueteng.

Naisaklang ni Estrada iti impeachment trial iti Senado ngem napadisi iti puestona gapu iti panagprotesta dagiti tattao iti Edsa kalpasan ti saan a panangipalubos dagiti kaaliadona a senador a maluktan ti maikadua nga envelope a mapapati a nakaipalaonan ti Velarde account.

Kinuna ti gobernador a kadakkelan a basol ni Estrada ti panangalana iti “bilion, ribu a milion, nga inkabilna iti maysa nga account, ti Jose Velarde account.”

“Daydiay ti kadakkelan a basolna.. daydiay ti plunder,” kinuna ni Singson.

Kinuna ni Singson nga idi damo, saan nga inako ni Estrada a kukuana ken saan a nagpirma iti nasao nga account, ngem adda dua a testigo, da Clarissa Ocampo ken Manuel Curato, a nangipalgak a nakitada ti napadisi a Presidente a nagpirma a kas Jose Velarde iti nasao nga account.

Kinuna ni Singson nga iti hearing, saan a makontra dagiti abogado ni Estrada ti testimonia da Ocampo ken Curato isu a pinaaminda ni Estrada nga isu ti nagpirma iti Velarde account ngem ipettengna a saanna a kukua ti nasao nga account.

“Sino ti loko a mamati iti daydiay? Agpirmaka iti saanmo a kukua?” kinuna pay ti gobernador.

“Dagidiay a bambanag ti pakasapulanmi ken ni Atong Ang ngem nalpas metten, ken saanen a kasapulan a papintasen pay ti kaso,” kinuna ni Singson sana innayon a very confidentda a makonbiktaran ni Estrada no la ketdi awan ti areglo.

Kinuna ni Singson nga idi timmawag ni Atong Ang, imbagana nga awanen ti maaramidna ken uray no kayatna ti tumulong, masapul a sanguen ni Ang ti kasona.

“Saan met a mabalin nga alaentayo a tumulong ket bitbitentayo… ta nagbasol met,” kinuna ti gobernador.