Footer

Kaadduanna kadagiti 15 nga orihinal a sakada, naggapu iti Candon

CANDON CITY – Kadagiti 15 nga immuna nga Ilokano a taga-Ilocos Sur a napan nangged iti kaunasan ti Hawaii sangagasut a tawenen ti napalabas, kaadduan kadakuada ti naggapu iti Candon.

Simmanglad iti Hawaii idi Disiembre 20, 1906 a naglugan iti SS Doric daytoy umuna a grupo dagiti Ilokano.

Karaman iti grupo dagiti agkabsat a Mariano Cortez ken Celestino Cortez, Simplicio Gironella ken dagiti annakna a da Mariano, Vicente, Francisco, ken Antonio; ken dagiti agkabsat a Prudencio ken Cecilio Sagun, agpapada amin a taga-Candon.

Kaduada iti grupo da Julian Galman, Martin de Jesus, Apolonio Ramos, Marcelino Bello, Filomeno Rebollido ken Emiliano Dasalla.

Inrugi ti Hawaii ti makatawen a selebrasion ti Sentenario dagiti Sakada idi Disiembre 10, 2005 ket agpa-tingga inton Disiembre daytoy a tawen.

Tampok ti nasao a selebrasion ti pannakabigbig ken panangidayaw kadagiti 15 nga Ilokano nga immuna a napan iti Hawaii tapno manggedda iti Ola’a Plantation iti Big Island.

Kas paset ti selebrasion ti Sentenario ti Sakada, idi Disiembre 16-21, 2005, maysa a delegasion a binukel dagiti 80 nga opisial ken kameng  ti Ilocos Surian Association of  Hawaii nga indauluan da Congressman Jun Abinsay ken Danny Villaruz, presidente ti ISAH, ti nangisayangkat iti homecoming medical mission para iti sumagmamano nga ili iti probinsia, kas iti Cabugao, Magsingal, Santa, Santiago ken Vigan City a nakaipaayan iti libre a konsultasion, ken operasion ken libre nga agas kadagiti marigrigat a residente iti probinsia.

Nangirusatda pay kadagiti pasalip ken pabuya iti edukasion, kultura, arte ken sports kadagiti nadumaduma a pagadalan iti probinsia kas paset ti makatawen a selebrasion.

Iti umuna a lawas ti Enero daytoy a tawen, indauluan met ni Gov. ti Hawaii Linda Lingle ti sabali pay a delegasion a nangbisita iti Ilocos Sur ket maysa kadagiti tampok nga aktibidadna ti pananglukaisna iti monumento ti Sakada iti Salomague Port iti Cabugao ken iti panagpasiarna iti Vigan Heritage Village a naglugan iti kalesa.

Pormal a naluktan ti makatawen a selebrasion ti Sakada Centennial idi Dis. 10, 2005 iti Hawaii Convention Center.

Kinuna ni Dip. Eric Singson a paur-urnongna dagiti estoria nga adda pakainaiganna kadagiti 15 nga orihinal a sakada.

Kiniddaw ni Singson kadagiti Filipino iti Hawaii nga adda ramutda iti Candon a mangted kadagiti estoria ken dadduma pay a pakalaglagipan iti kaaddada iti kaunasan tapno maipabuya iti Museo de Candon.