Footer

Mamayor ti siudad nag-lobby iti Senado

Nag-lobby iti Senado dagiti mayor dagiti  siudad iti intero a pagilian itay nabiit tapno supiatenda ti gakat nga impasa ti Kamara a mangpadaras iti pannakaaprobar iti aplikasion dagiti munisipalidad nga agbalin a siudad.

Kinuna ni Vigan City Acting Mayor Franz Ranches a napanda indatag ti position paper ti League of Cities of the Philippines iti Senado a nangkontraanda iti House Resolution No. 1 a mangpadaras iti pannakaaprobar ti aplikasion dagiti 26 a munisipalidad nga agbalin a siudad.

Kinuna ni Ranches nga iti  nasao a resolusion ti Kamara, saanen a maiyaplikar ti P100 milion income  requirement iti panagbalin ti maysa a munisipalidad a siudad.

Tallo ti requirement a kasapulan a tun-oyen ti munisipalidad tapno maikonsidera ti aplikasionna nga agbalin a siudad: pamastrekan, land area ken populasion.

Kinuna ni Ranches nga iti panagkita ti League of Cities a pakairamanan ti City of Vigan, panaglabsing iti linteg ti tignay ti Kamara a mangpadaras iti aplikasion dagiti munisipalidad nga agbalin a siudad a saanen a masurot ti income requirement nga intuding ti Rep. Act 9009.

Impalgak ni Ranches a nangaramid ti city government iti resolusion a nangkontraanna iti House Resolution No. 1.

Impalgak ti acting mayor nga adda 26 nga aplikasion dagiti munisipalidad nga agbalin a siudad idinto a 13 ti pending iti Kamara.

“Saan a gapu ta saantayo a kayat ti panagsiudad dagiti munisipalidad nga agaplikar basta la ketdi kualipikadoda ken masurot ti linteg, saan a ma-shortcut wenno ma-fast track,” kinuna ni Ranches.

Kinuna ni Ranches a no maaprobaran ti resolusion, mapukawan ti Vigan City iti P16 milion a bingayna iti internal revenue allotment.

“Umad-adu ti agaplikar nga agbalin a siudad, bumasbassit ti pagbibingayan nga IRA,” kinuna ti bise mayor idinto nga innayonna nga iti kallabes a tawen, idinto a saan a ngimmato ti IRA nga aw-awaten dagiti siudad, ngimmato kadagiti munisipalidad ken probinsia.

Segun ken ni Ranches, saan pay a tinaming ti Senado ti nasao a resolusion gapu iti panangidatagda iti position paper a mangkontra iti daytoy.

“Moral a balligi iti biang ti League of Cities,” kinuna ni Ranches.