Footer

Motorsiklo, traysikel, dinungpar ti dyip

VIGAN CITY – Inarado ti maysa nga owner-type jeep ti masabatna a motorsiklo ken traysikel gapu iti pannakapukaw ti direksionna bayat ti panagdaliasatna iti Quirino Boulevard a saklaw ti Barangay Tamag.

Nadunor da Jerry Arizala, Jerry Artillero, 37, naasawaan, residente ti Poro, Magsingal, Ilocos Sur, ken Renato Rapin, 24, naasawaan, agnaed iti Balaleng, Bantay, Ilocos Sur ket naitarayda iti Gabriela Silang General Hospital para iti pannakataming dagiti sugatda.

Segun iti inbestigasion dagiti polis, agturturong iti amianan a direksion ti dyip a minaneho ni Lydia Pajarillo, 42, awanan asawa, taga-Balaleng, Bantay, Ilocos Sur idi napukaw ti direksion daytoy ket dinungparna ti XRM a motorsiklo a nagluganan da Arizala ken Artillero ken ti Yamaha RS a traysikel a minaneho ni Rapin.

Nakaro ti dadael dagiti tallo a lugan.