Footer

Naglibas ni Boy Kimat! (Maikapat a paset)

PAGAMMUAN, nakangeg ni Jessie iti tallo a nagsasaruno a kanalbuong manipud iti salas a kagiddan dagiti makaaliaw nga asug. Kellaat a naiddep ti silaw iti ngatuen ti ridaw.

Nagtaray ni Jessie nga immuneg iti paraangan. Kellaat, nagkanalbuong iti asideg ti ridaw. Simmanengseng ti bala  iti lulonanna. Insuyona ti bagina iti kamuyongan.

Bimmales a nagpaputok. Namitlo. Ngem awan ti simmungbat.

Nagpaliiw. Nagari manen ti ulimek!

Iti daya, umas-asideg ti sirena dagiti lugan. Dagiti back-up!

Nakangeg iti ungor ti lugan manipud iti nagkurusan. Timmaray a rimmuar iti inaladan nga agturong iti naggapuan ti ungor.  Nakitana ti kutit ti lugan a bimmanesbes nga umadayo nga agpaabagatan. Nagparintuod sa nagpaputok iti namitlo. Rimsik ti metal a simmayagan dagiti bala.

Nagsubli ni Jessie iti inaladan. Nagarudok a kimmamang iti likudan ti balay.

Adda nangegna nga asug iti asideg ti ridaw. Naitimkanna ni Melvin.

Immasideg ni Jessie kalpasan a masiguradona nga awan ti mangpalpaliiw kadakuada.

“Apay, ania ti napasamak?” sinaludsod ni Jessie.

“Namaysaannak ti sinalbag!” kinuna ni Melvin. “Diak napasimudaan a sarsarunnuennak. Naladawen idi makadlawak. Daytoy, pinaleknak. Naimbag ta dinak napuruan…”

Nakalukat ti ridaw ti kusina. Sinapul ni Jessie ti swits babaen ti tulong ti lawag ti selponna.

Sinabat ti bang-i ti pulbora apaman a nakadap-aw iti salas.  Naidasay ni Alias Diango iti arsadanan ti agdan.

Nakamulagat ni Diango. Masigurado ni Jessie a pettat ti ipapatayna. Malaksid iti sugatna iti barukong, sinalput pay ti bala ti ulona!

Impalawlaw ni Jessie ti pnagkitana. Naurnos dagiti alikamen iti salas. Naunaan la ketdi ni Alias Diango!

Nakangeg iti asug manipud iti likudan ti agdan. Inwalinna ti kurtina. Ni Ditas, ti asawa ni Boy Kimat!

Nagparintuod ni Jessie iti uluanan ni Ditas. Nasellepen iti dara ti makannawan a barukongna. Impulsuanna. Sibibiag pay.

“Mangegnak, Ditas? Sino ti pimmaltog kadakayo?” sinaludsod ni Jessie.

“N-ni… Boy…”arig-arasaas laengen ti boses ni Ditas. Madamdama, nagsalungayngayen ti ulona.

NABAYAG a minulenglengan ni Jessie dagiti report iti rabaw ti lamisaanna.

Naggapu ti report manipud iti Ballistics section.

Kalibre .45 ti naaramat nga igam iti pannakapapatay da Alias Diango ken Ditas.

Nasarakanda ti paltog ni Alias Diango iti pandag ti punganna. Husto ti suspetsana, saan a ninamnama ni Alias Diango a rauten ni Boy Kimat.

Apay a saan a nagprekusion ni Alias Diango nga isu ti puntiria ni Boy Kimat a patayen gapu iti panangliputna iti gayyemna? Wenno natalged ti rikna ni Alias Diango a saan ida a mabirokan ni Boy Kimat sakbay a makamatan dagiti pannakabagi ti linteg.?

Pinidut ni Jessie ti auditibo ti telepono ket timmawag iti ballistics.

“Pinagdasigyo ti lemma ti bala a naalayo iti bagi ti guardia a pinaltogan ni Boy Kimat iti lemma ti bala a nanggudas kada Alias Diango ken ti kabitna?” sinaludsodna.

“Wen, sir. Sabali a paltog ti naaramat iti Diango slay!”

“Siguradoka?”

“Agpada a kuarentay singko ti paltog a nanggudas iti guardia ken ni Alias Diango ken ni Ditas ngem agsupadi a paltog. Mabasamto ti resulta ti ballistics examination iti reportko.”

“Itedmo kaniak after 10 minutes, okey?”

Nakarenken ti muging ni Jessie a nagliad iti tugawna. Madamdama, simngaw ti sagawisiwna.

Masirib met ni Boy Kimat. Kalpasan ti pananggudasna  iti guardia ken panangpaltogna  iti asawa ni Mario Corpuz, impalladawna ti paltog sa nangala iti sabali.

Nagsukat iti paltog ni Boy Kimat tapno saan a matuntonan nga isu ti pimmatay kada Alias Diango ken ti asawana!

Ngem nangalaanna iti paltog? Saan a nalaka a mangala iti sabali a paltog uray adda kontakna kadagiti aglaklako iti kolorum nga armas ta nagsawaren dagiti polis a mangbirbirok kenkuana.

Posible ngarud nga adda iduldulinna a bukodna a paltog.

Kasla nagpukaw nga asuk ni Boy Kimat kalpasan ti panangpatayna kada Alias Diango ken Ditas. Adda la ketdi paglemlemmenganna.

Inruar ni Jessie ti bassit a notebookna, inukagna sana binirok ti numero ti selpon ni Carla.

“Sino ba ito?” makaunget ti timek ni Carla. “Ke aga-aga, nang-iisturboka!”

“Ni Lily ti masapulko,” kinuna ketdi ni Jessie. “Pakabirokan kenkuana?”

“Diak ammo, sir. Dina kayat nga ibaga. Nagsuspetsa idi damagek. Ammonan a naglibas ni Boy Kimat.”

“Saankan nga aglibak. Ammokon a nagtarus dita ni Boy Kimat iti karabian ti panaglibasna iti pagbaludan. Agpudnoka laengen no dimo kayat ti maikursong iti pagbaludan!”

Nagulimek ni Carla.

“Ikkanka iti lima a minutos nga agpanunot!” kinuna ni Jessie.

“Okey, sigurado a kaguranak ni Lily ngem diak kayat ti maisagmak,” kinuna ni Carla. “Iti dagusmi ti nagpaknian ni Boy Kimat iti  daydi a rabii a panaglibasna. Ngem pimmanawda met laeng ken ni Lily kabigatanna. Dina imbaga no sadino ti nangilemmenganna ken ni Boy Kimat.”

Indisso ni Jessie ti auditibo.Nagliad manen iti tugawna. Nabayag a pinulingling ti panunotna dagiti pasamak.

No kasta, di pay ammo ni Boy Kimat nga adda sabali a karelasion ni Lily. No ammona, bala koman ti impaammalna ken ni Lily.

Ni la ketdi Lily ti nagtaudan ti paltog nga inaramat ni Boy Kimat a nangpatay kada Alias Diango ken ni Ditas. Posible a paltog ni Boy Kimat nga impaidulinna ken ni Lily.

Nakangeg iti tallo a nagsasaruno a tuktok iti ridaw. Ni Andy manipud iti ballistics section. Iggemna ti resulta ti panangamirisna iti lemma ti bala a nanggudas iti guardia ken kada Alias Diango ken Ditas.

Pinalabsan ni Jessie ti report. Uray agdadamo, makitana ti dakkel a naggidiatan ti lemma dagiti dua a bala.

Inruar ni Jessie ti selponna ket binirokna ti numero ti selpon ni Dionie, ti guardia ti M & M Enterprises a pagpapaayan ni Mario Corpuz.

“Dionie, ammomon ti babai a pagpatpatayan  ni Corpuz?” inamadna.

“Wen, bossing. Ngem diak pay napennek no isu nga agpayso.”

“Ania ti naganna?”

“Lily, bossing. Kahera iti Hot Stuff. Naminsanen a naitebolmi idi napankami naghapihapi iti Hot Stuff. Daydiay a pammagi, di nakakaskasdaaw a pagpatpatayan ni Corpuz!”

Tinawagan ni Jessie ni Melvin.

“Kayatko ti mapan uminom iti Hot Stuff no rabii, ania, okeyka?”

“Nagsayaaten, bossing. Agunika latta, kinuna ni Melvin.”

“Official business, not pleasure, Melvin,” nagkatawa ni Jessie.

NAGMATTIDER  ni Jessie iti ruangan ti Hot Stuff ket inwarasna ti panagkitana. Gumilapgilap dagiti nalidem a silaw. Iti salonan, kumkumpasan dagiti asmang ti naparagsit a tokar manipud iti karaoke. Alas nuebe pay laeng ti rabii ngem naarimbangawen ti aglawlaw.

“Agsinata iti lamisaan. Dika madanagan iti mainommo, siak ti makaammo,” inyarikap ni Jessie ti lima gasut ken ni Melvin.

“Itay pay la a kayat ti karabukobko ti maayusan, bossing,” inrungiit ni Melvin.

“Dinak suroten no pumanawak. Ni Lily ti siputam. Surotem no pumanaw iti klub. Tawagannak iti selpon, okey?”

“Kasanon no kursonadak ti mangitebol, bossing?”

“Makaammoka. Ngem sikan ti agbayad iti mainomna.”

Pinili ni Jessie ti lamisaan nga adda iti suli. Sineniasanna ti serbidor. Nagorder iti serbesa.

“Bakante ni Lily?” inamadna.

“Buenasmo, boss. Kapampanaw ti parokianona.”

Nagsenias ti serbidor. Madamdama, immasideg ni Lily. Napudaw. Gimmitara ti pammagina. Aginakbay ti  bangbanglona.

Binagkat ni Lily ti tugaw sa immabay ken ni Jessie. Nagdennes ti takiagda.

Sineniasan ni Jessie ti serbidor ket nagpaala iti inumen ni Lily.

“Pudno ti damag, talaga gayam a nalapsatka,” kinuna ni Jessie.

“Adudan a nangisawang iti dayta,” inkatawa ni Lily.

“Maikamanoakon a nangibalikas?”

“Diakon  mabilang!” nagallon ti barukong ni Lily iti panagkatawana.

“Kas ni Mario Corpuz?” kiasla awan aniaman a sinaludsod ni Jessie.

“A-am-ammom ni Mario?” naglumen ti isem ni Lily.

“Agkabarkadakami. Masansan nga ibidbidanaka. Makitak itan nga adda gayam pamkuatanna a mangipasindayag kenka.”

“Dika makitkita a kadua ni Mar no umay ditoy.”

“Ammomon ti napasamak?” binaliwan ni Jessie ti saritaan.

“Ti ania?”

“Napapatay ti asawa ni Mario Corpuz.”

“Sino ti pimmatay?”

“Ni Boy Kimat ti suspetsa. Am-ammom ni Boy Kimat, saan kadi?”

“P-poliska kadi?” immatap ti mata ni Lily.

[ Adda tuloyna ]