Footer

Tanod, napaltogan

STA. MARIA, Ilocos Sur – Dua a lalaki ti nangpaltog iti maysa a barangay tanod kabayatan ti panangtulongna kadagiti agbasbasa nga ubbing nga agballasiw iti kalsada iti Maynganay Norte.

Nainaganan ti biktima a ni Rolando Divina, 47, tanod, ngem  saan a nabigbig dagiti nangpaltog kenkuana.

Naammuan iti imbestigasion a madama nga iwanwanwan ti biktima dagiti agbasbasa iti Maynganay Elementary School nga agballasiw iti kalsada idi lumabas ti dua a nakahelmet a lallaki a nakasakay iti awanan plaka nga RS Yamaha 100 ket  pinaltoganda ti biktima.

Naitaray ti biktima iti Reyes Clinic and Hospital, sa naiyalis iti Gabriela Silang General Hospital para iti panakaagasna.

Insigida a naglibas dagiti di pay nabigbig a suspetsa kalpasan ti pammaltog.