Footer

Vigan City: Most child-friendly local gov’t unit iti Rehion I

VIGAN CITY – Sabali manen a pammadayaw ti nagun-od ti Vigan City: ti Presidential Awardee for the Most Child-Friendly Local Government Unit para kadagiti component cities ken umuna agingga iti maikapat ti klasena a munisipalidad iti Region I.

Daytoy ti naammuan manipud ken ni Mayor Ferdinand C. Medina bayat ti interbiona iti media itay nabiit.

Naammuan a ti evaluation team ket binukel dagiti nadumaduma nga ahensia iti Region I a pakaibilangan ti Department of Education, Department of Social Welfare and Development, Department of Health ken National Economic Development Administration ket kangrunaan a kinitada no kasano ti pannakamanehar dagiti ubbing ditoy.

Segun ti mayor, nagbisita dagiti evaluators idi Agosto iti daytoy a tawen ket kinitada dagiti pasilidad dagiti lima a day care centers iti siudad no maiyannatop met laeng para kadagiti kasapulan dagiti ubbing iti panagbasada.

Iti panagbisita dagiti evaluators kadagiti barangay, sinukimatda pay dagiti rekord ken dagiti naipasa nga ordinansa a mangprotehir ken tumulong iti pannakamuli dagiti ubbing tapno agbalinda a nasayaat nga umili iti masakbayan.

Kinuna ni Medina a dinayaw dagiti evaluators dagiti gannuat ken programa ti gobierno ti siudad para kadagiti ubbing, kas iti pannakaipasa ti Youth Code of Vigan ken iti pannakaipaskil dagiti ballaag kadagiti amusement centers ken galiera iti saan a pannakaipalubos dagiti ubbing a sumrek kadagitoy nga establisimiento, nangruna iti kaadda ti klaseda, tapno maiyadayoda iti bisio ken saan a maiyaw-awan ti panagbasada.

Innayon ni Medina a maysa kadagiti kangrunaan a dinayaw ti evaluating team ti panagwengweng ti sirena iti alas dies ti rabii kas pammalagip kadagiti ubbing a saandan nga agwalangwalang iti ruar ti balayda iti alas onse ti rabii a pannakaipakat iti curfew kadagiti menor de edad.

“Segun kadagiti evaluators, awan ti LGU a mangipakpakat iti daytoy iti intero a Region I,” kinuna ni Medina.

Napili pay ti Vigan a Best in Region I iti implementasion ti programa ti nutrision, Cleanest and Greenest City in Region I, Cleanest and Best Public Market in Region I, TESDA Kabalikat Awardee gapu iti Eskuwela Talyer, ken The Best of the Best Consumer Welfare Desk iti intero a Pilipinas.