Footer

Cultural mappers, idukomentoda dagiti tourist spots iti I. Norte, I. Sur

VIGAN CITY – Ti problematayo a Filipino, ti panagkurkurang ti identidadtayo.

Kinuna ni Vice Mayor Franz Ranches bayat ti programa a “Ti Konseho ti Vigan” a nakatrataran iti agtultuloy a cultural mapping kadagiti nabaknang a tawid daytoy a siudad a “no adda karirikna ti maysa a tao iti historia, wenno ikkanna iti importansia ti tawidna, ditoy a makitana ti identidadna.”

“No dadduma, ti problematayo a Filipino, agkurkurangtayo iti identidad. Ditayo ammo no Amerikanotayo, Intsik wenno Hapon ta napigsa ti kolonial a mentalidadtayo,” kinuna ni Ranches.

Kanaig daytoy, kas paset ti panangidukomentoda kadagiti tawid ditoy, binisita itay nabiit ti cultural mapping team dagiti sumagmamano a historical spots a pakairamanan ti Museo Ilocos Norte iti Laoag City ken maysa a nakonserba a daan a a pagtaengan iti Batac, Ilocos Norte ken ti National Heroes Memorial Park iti Santa ken ti beddeng ti Santa ken Narvacan a nakapasamakan iti nadara a ranget iti nagbaetan dagiti soldado nga Espaniol ken ti grupo dagiti rebolusionario a Filipino.

Karaman iti grupo a nagbisita da Ranches ken sumagmamano nga opisial ti siudad a pakaibilangan da Konsehal Everin Molina ken Konsehal Germelina S. Goulart.

Kinuna ni Ranches a no madakamat ti “tawid, ti laeng balay ti sumrek iti panunottayo”, ngem paset laeng gayam ti nalawa a saklawna.

Inlawlawag ti bise mayor a nadumaduma ti klase dagiti tawid, kas iti built heritage a pakaibilangan dagiti naipatakder a daan a pagtaengan ken pasdek; dagiti intangible heritage, kas dagiti musika ken salsala, dagiti movable heritage, kas kadagiti bulto dagiti santo ken antigo nga alahas; ken ti natural heritage a pakairamanan dagiti karayan, kayo ken dadduma pay.

“…No adda identidad(mo), kumpletoka a tao, naan-anayka a Filipino,” inyunay-unay ti bise mayor.

Maysa ti Vigan City kadagiti inlista ti Unesco a heritage city a maibilang a sanikua ti sangalubongan ket pagrebbengan ti internasional a komunidad a salakniban, preserbaen ken konserbaen.

Maysan daytoy a siudad kadagiti kangrunaan a destinasion dagiti turista iti Amianan.