Footer

Iti pilid ti biag

ITAY NABIIT, napadisi ni Prime Minister ti Thailand, Thaksin Shinawatra babaen ti kudeta nga inwayat ti militar nga indauluan ni Commander in Chief Gen. Sondhi Boonyaratkalin. Awan ti naiparukpok a dara kalpasan nga inted ni King Bhumidel Adulyadej ti pammendisionna iti naiwayat a kudeta.

Itay  Sept. 20, impakat ti militar ti martial law ket sinuspendena ti konstitusion ken ti parliamento. Iti panagparang ni Sondhi iti nasional a telebision, impalawagna nga inwayatda ti military takeover tapno mapagmaymaysa ti pagilianda a biningbingay ti alegasion ti panagkunniber ken atokratibo a linteg. Inkari ni Sondhi nga isublida ti demokrasia iti las-ud ti makatawen.

Kanaig daytoy, pinasardeng ti hunta amin a politikal nga aktibidad, inikkatda dagiti opisial a napudno ken ni Thaksin ken kaawan ti maiwayat nga eleksion iti Oktubre ken pinaserraanna dagiti radio stations ken pagiwarnak.

Adda dagiti pagkaingasan ti kasasaad ti politika ken agtuturay iti Thailand ken iti pagiliantayo.

Kas ken ni Thaksin a mababbabalaw gapu kadagiti alegasion ti korapsion ken otokratibo a panagituray, kasta met ken ni Pres. Macapagal-Arroyo.

Itay laeng nabiit, kineltay dagiti kaaliado ni Pres. Arroyo iti Kamara ti impeachment complaint kontra ti President gapu  iti mapapati a panagsuitik iti eleksion, panangaramat kadagiti pundo ti gobierno idi eleksion ti 2004, dagiti politikal killings ken dadduma pay.

Itay laeng Pebrero, impaulog ti Presidente ti Proc. No. 1017 tapno masalakniban ti gobierno iti kunana a panagpanggep ti kannawan, kannigid, ken sentro a mangagaw iti turay. Sumagmamano nga opisial ti militar ti nakasuan iti babaen ti military court.

Ngem saan latta nga agtalna dagiti kritiko a mangbabbabalaw ken ni Pres. Arroyo.

Nupay kasta, makita a nasarkedan ni Pres. Arroyo dagitoy ket nataltalged itan ti gobiernona ngem idi napan a tawen. Pagyamanan iti agtultuloy a panangsuporta kenkuana ti opisial ti militar ken polis.

Linukaisan ti pasamak iti Thailand nga adda iti liderato dagiti turayen ti pagilian ti kinatalingenngen ti pagilian, nangnangruna iti benneg ti politika. Isunsunel ti pasamak iti nasao a pagilian nga uray kasano kapigsa ken kabileg ti maysa a turayen no kinullaapan dagiti anomalia, kontrobersia, kinaruker ken panagabuso ti turayna, saan a mainsasaan a dumteng ti panawen nga adda tumakder a mangidaulo iti pannakaikkat wenno pannakapadisina iti puestona.

No kitaentayo ti historia dagiti pagilian, namirit kadagiti agtuturay nga uray kinawesanda ti bukod a bagida kadagiti amin a bileg ken turay, dimteng latta ti pannakapadisi ken pannakaikkatda iti trabaho.

Kasta ti biag: Kas iti pilid nga agtulid. Ita, addaka iti ngato, inton bigat, addaka iti baba. Dayta ti leksion ti kudeta iti Thailand.

Ngem ti saludsod: masirip wenno maanag kadi dagiti agdama nga agtuturaytayo dayta a leksion ti historia?

Comments are closed.