Footer

Konseho ti Bantay, imbabana plete iti traysikel

BANTAY, Ilocos Sur – Dinayaw dagiti residente, nangruna dagiti commuters, ti Sangguniang Bayan gapu iti panangwaswasna iti inaprobaranna nga ordinansa a mangingato iti plete a singiren dagiti traysikelan ditoy nga ili.

Iti naudi a sessionda, winaswas ti konseho ditoy ti P10.00 a singir ti plete ket insublina iti P8.00 a dati a masingsingir sakbay ti tricycle fare hike.

Kinuna ti maysa a residente ditoy a dayawenna ti Sangguniang Bayan gapu iti panangibabawina iti inaprobaranna a fare increase iti sanguanan ti posible nga isusupiat dagiti agpaspasada ken tricycle operators.

Ngem kinuna ni Vice Mayor Floro Peredo a patien ti konseho nga idauluanna a di agsakit ti nakem dagiti agpaspasada ken operators agsipud ta presente met dagiti opisial ti Bantay Tricycle Operators and Drivers Association (BTODA), sumagmamano a barangay officials ken commuters bayat ti sessionda a nakawaswasan ti resolusion a nangipangato iti singir ti plete iti traysikel.

Innayon ni Peredo a pagrebbengan ti sangguniang bayan ti mangtratar ken mangaprobar iti maysa a gakat, kasta met ti panangamendar ken pannakawaswasna no adda petision a maipila kadakuada iti konseho.

Kanaig daytoy, kinuna ni Konsehal George Leones, chair ti committee on transportation, iti pannakipatpatang ti media kenkuana, a nupay adda dagiti saan a napagustuan iti panangipababa ti konseho iti singir ti plete ti traysikel, inaramidda daytoy gapu iti adu a kiddaw dagiti kailianda ken kasta met iti nagsaruno a pannakaipababa ti presio ti gasolina.

Maipalagip nga inaprobaran ti konseho ti petision dagiti traysikelan a mangipangato iti plete iti P10.00 agsipud iti nagsasaruno a panagpangato dagiti presio ti lana ken produkto a petrolio iti world market ngem idi aprobarandan, isu metten ti pannakaipakat iti rollback ti presio dagiti nasao a produkto.

Kinuna ni Leones nga agiwarwarasda iti kabarbaro a matrix ti plete a nakailanadan dagiti naipababa a plete tapno adda suroten dagiti agpaspasada ken commuters.

Gapu iti daytoy nga inwayat ti konseho, manamnama ti pannakaidatag dagiti petision dagiti residente dagiti kabangibang daytoy nga ili, nangruna iti Vigan City, iti pannakaibaba met iti pagplete iti traysikel.