Footer

Lalaki, natay iti aksidente

SANTIAGO, Ilocos Sur – Nasapgid ti maysa a motorsiklo ti sabali a motorsiklo iti panangoberteykna a nagresulta iti pannakatay ti maysa a nakilubbon iti lugan.

Nainaganan ti biktima a ni Herminio Ragma, Jr., agnaed ditoy ket pimmusay iti ospital a nakaitarayanna.

Naammuan iti belated report a dimmanon iti polis ditoy nga agsarsaruno nga agdaldaliasat iti national highway a saklaw ti barangay Caburao ti motorsiklo a CT 100, addaan plaka IB-6694, a minaneho ni Joseph Christian Anga-angaan, 20, ken residente iti Al-aludig iti daytoy nga ili ken ti TMX a motorsiklo, addaan iti plaka OP-9847, a minaneho ni Alanyuri Pasion, 27, ken taga-Salincub, ditoy idi nag-overtake ti maysa ket dita a nasapgidna ti sabali a lugan.

Maigapu iti daytoy, saan a nakontrol ni Anga-angan ti manibela ti luganda a nakilubbonan ti biktima ket naisarubsobda iti abaga ti kalsada.

Immuna a naitaray ti biktima iti Candon General Hospital sa naiyalis iti regional hospital iti La Union, ngem pimmusay bayat ti pannakataming dagiti sugatna.

Comments are closed.