Footer

Maisagsagana, pannakarambak maika-2 a Feria Expocision de Candon

CANDON CITY – Agsagsaganan ti siudad para iti ad-adda a naballigi a panakarambak ti maikadua a Feria Exposicion de Candon.

Daytoy ti impalgak ni City Mayor Allen Singson ti Candon, kabayatan ti pannakiuman-uman kenkuana ti DZTP Radio Tirad Pass ken ti Tawid News Magasin itay nabiit.

“Maar-aramiden dagiti pakpakauna a miting iti daytoy a panangrambaktayo iti Feria Expocision de Candon inton Disiembre babaen ti panangidaulo ni Congressman Eric Singson, ” kinuna ti mayor.

Innayon ni Mayor Singson, a maigiddan ti selebrasion iti pananglagip iti umuna a 15 a Sakada a nagtrabaho iti kaunasan idiay Hawaii idi 1906.

Inrugi ti Hawaii ti makatawen a selebrasion ti Sentenario dagiti Sakada idi Disiembre 2005 ket agpatingga inton Disiembre iti daytoy a tawen.

Kaadduanna kadagiti immuna a 15 a trabahador a napan iti Hawaii idi 1906 tapno mangged iti kaunasan sadiay ti naggapu iti Candon.

Karaman iti grupo dagiti agkabsat a Mariano Cortez ken Celestino Cortez, Simplicio Gironella ken dagiti annakna a da Mariano, Vicente, Francisco, ken Antonio; ken dagiti agkabsat a Prudencio ken Cecilio Sagun, agpapada amin a taga-Candon.

Kaduada iti grupo da Julian Galman, Martin de Jesus, Apolonio Ramos, Marcelino Bello, Filomeno Rebollido ken Emiliano Dasalla.

Maipalagip a ti Feria Exposicion ti kangayedan a programa a panakaiparang kadagiti nadumaduma a produkto/talento a naaramid idi 1892 iti sibubukel a rehion ti Ilocandia. Nalagip daytoy itay napalabas a tawen, ket nagbalin a maikadua a kangrunaan a piesta ti siudad ti Candon.

Kinuna ni Singson nga itultuloy ti gobierno ti siudad a rambakan ti Feria Expocision de Candon tapno biagen ti ngayed ti piesta. Iti agdama, nakatakder pay laeng ditoy ti torre a naibangon a kas kaarngi iti Feria idi 1892.

Kagapgapu ni Dip. Singson manipud iti Hawaii a timmabuno iti paset ti parambak ti Sentenario dagiti Sakada babaen ti awis dagiti agtuturay ti Hawaii ken dagiti opisial dagiti nadumaduma a gunglo dagiti Ilokano. Maysa met kadagiti kangrunaan a sangaili iti nasao nga okasion ni Gov. Luis “Chavit” Singson.

Tampok ti programa ti pannakalukais ti monumento ti maysa a Sakada.

Idi Enero daytoy a tawen, indauluan ni Gov. Linda Lingle ti maysa a delegasion a bimmisita iti Ilocos Sur ket pinasiarda dagiti sumagmamano nga ili iti probinsia a pakairamanan ti Salomague Port a limmuasan ti maikadua a grupo dagiti Ilokano a napan nangged iti kaunasan iti Hawaii idi 1946.

Comments are closed.