Footer

Naglibas ni Boy Kimat! (Maikalima a paset)

SAAN a simmungbat ni Lily.

“Daytoy pay. Napapatay met ti asawa ni Boy Kimat ken ni Alias Diango. Manen, ni Boy Kimat ti kangrunaan a suspetsa.  Am-ammom met isuda, saan kadi?” kinuna ni Jessie.

Timmakder ni Lily ngem inggawid ni Jessie.

“Agtugawka,” kinunana. “Dimo kayat a sika ti agbalin a sentro ti atension dagiti kustomer ditoy, saan?”

Nagtugaw ni Lily. Pinagrittuokna dagiti ramayna.

“Diak kayat ti mairamraman,” nababa ngem natbag ti timekna.

“Ammomin nga adda relasionyo ken ni Boy Kimat. Ammomi metten nga addan kabbalaymo a sabali idi maibalud ni Boy Kimat. Ammom metten ti kinarakaran ni Boy Kimat. Sigurado nga ikalinaka a sibibiag no maduktalanna dayta.”

Saanen nga inuray ni Jessie ti isungbat ni Lily. Sinitsitanna ti serbidor sana binayadan ti nainomda.

“Iballakadko nga agpaknikayo pay iti sugar daddym sakbay a mabirokannakayo ni Boy Kimat,” kinuna ni Jessie sana pinisel ti pingping ni Lily.

Rimmuar iti klub. Nagtarus iti patrol car a naiparada iti likudan ti dua a sabali pay a kotse iti labes ti nagkurusan.

Impusotna ti bagina iti tugaw. Nagpayubyob. Nakasentro ti matana iti ruangan ti klub.

Madamdama, tumalangkiaw ni Lily a rimmuar iti Hot Stuff.

Simmaruno kenkuana ni Melvin. Nagmattider ni Melvin iti sanguanan ti klub. Adda kinautna iti bulsana. Madamdama, nagkiriring ti selpon ni Jessie.
“Surotek, bossing?”

“Wen, dimo sinaan.”

Pinara ni Lily ti lumabas a taksi.

Nangpara met ni Melvin iti taksi. Nagsaruno dagiti dua a lugan a pimmanaw iti klub.

Pinagandar ni Jessie ti lugan. Sinurotna ti likudan ti taksi a nagluganan ni Melvin. Duada a mangsurot ken ni Lily tapno saanna ida a malusotan.

Nagsikko ti immuna a taksi iti kanawan. Pinanurnorna ti Jacinto Street.  Linabsanda ti Tamag. Madamdama, masungaddan ti arko sakbay ti  Salindeg.  Naginayad ti taksi sa nagpalaud.

Tinaldiapan ni Jessie dagiti malabsanda. Mangrugin a rumasay dagiti balbalay. Iti agsumbangir ti kalsada, naidarnap dagiti kataltalonan.

Nagsikko ti  taksi iti Pung-ol.  Pinanurnorna ti deretso a kalsada. Iti nagkurusan, nagmenor ti taksi sa nagpaamianan. Masungaddan ti Paratong.

Naginayad ti lugan iti maikatlo a krosing. Nagsardeng iti batog ti dua kadsaaran nga apartment.

Dimsaag ni Lily. Simrek iti inaladan.

“Bossing, aniat’ aramidek?” inamad ni Melvin.

“Dumsaagka ta kitaem no sino ti kasinnarakna, no ni Boy Kimat wenno ti kabbalayna.”

Insikko ni Jessie ti patrol car  iti nagkurusan. Impaigidna iti saan unay a madanon ti lawag manipud iti poste.

Dimsaag ni Jessie sa pinanurnorna ti panipngeten a kalsada nga agpaabagatan. Iti makannawanna ti pattapattana a likudan ti apartment a simrekan ni Lily.

Sinurotna ti eskinita a simiasi iti kalsada. Ngem di pay nakaadayo idi makangeg iti ungor ti lugan nga aggapu iti kalsada.

Nagtaray a nagsubli ni Jessie. Sumungaden ti nangisit a kotse. Naipasirna ti maysa a tao iti likudan ti manibela. Kapkapnekanna a babai ti kaduana iti sango. Ni Lily?

Nagpatnga ni Jessie sana insenias nga agsardeng ti lugan. Putok ketdi ti insungbat ti adda iti manibela. Simiag ti bala iti ulo ni Jessie. Insuyona ti bagina iti eskinita. Nagtulatid idinto nga inasutna ti paltogna sana pinagsasaruno a kinalbit. Ngem nakasikkon ti lugan iti nagkurusan.

Nagtaray ni Jessie a nagsubli iti patrol car. Tinawaganna ni Melvin.

“Addaak iti sanguanan ti apartment, bossing,” kinuna ni Melvin. “Saan pay a rimmuar ni Lily. Ania daydiay putok a nangegko?”

“Awanen, nakalibasen ni Lily,” nakuna ni Jessie.

INUKAG ni Jessie ti report iti operasionda ken ni Melvin iti napalabas a rabii.
 
Naammuanda iti akinkukua nga up-upaan ni Lily ti apartment. Duan a bulanna. Nangipauna iti upana iti apartment para iti innem a bulan.

Segun pay iti baket, naulimek ken saan a mannakilangen ni Lily. Dina ammo nga agtrabtrabaho iti klub.

Kasta met nga awan ti ammona a kabbalay ni Lily. Ngem idi kanikadua a rabii, adda nakitana a lalaki iti apartment ni Lily. Dina am-ammo ti lalaki ngem saan a nagsalsaludsod ken ni Lily ta dina kayat ti makibiang iti biag iti sabali a tao.

“Mailasinko no makitak,” kinuna ti akinkukua iti apartment.

Naamirisen dagiti inbestigador dagiti naalada a lemma ti ramay iti uneg ti apartment ni Lily.

Lemma ti ramay ni Boy Kimat. Adda met lemma dagiti di pay ammo a tattao. Ken ni Lily dagiti dadduma, sigurado.

Nasarakan metten dagiti inbestigador ti bala a naiputok kenkuana a naikali iti puon ti akasia iti labes ti nagkurusan.

Nagtaud ti bala iti paltog a nanggudas kada Alias Diango ken Ditas.

Awanen ti duadua a ni Boy Kimat ti kadua ni Lily iti apartment iti dayta a rabii. Positibo metten a dua ti paltog nga us-usaren ni Boy Kimat!

No kasta, saan pay nga ammo ni Boy Kimat nga addan sabali a kabbalay ni Lily. Agpeggad la ketdi ti biag ni Lily no masukalan ni Boy Kimat a trineydor daytoy.

Nagliad ni Jessie iti tugawna sana pinagakkub  dagiti dakulapna iti teltelna. Nabayag a minulenglenganna ti bobeda.

Madamdama, inruarna ti mapa ti siudad. Pinadasna a suroten ti nagdalananan ni Boy Kimat manipud naglibas iti pagbaludan.

Nagkuretret ti mugingna a nangmulengleng iti mapa. Ngem rimmaniag met laeng ti rupana idi agangay.

Agsusuroten amin dagiti pasamak a mangsirot iti tengnged ni Boy Kimat. Dua laengen a banag ti masapul a patalgedanna tapno makumpleton ti puzzle.

Timmawag iti ballistics. Ngem naggawiden ni Andy.

Tinawagan ni Jessie babaen ti selpon ni Dionnie, ti guardia ti M & M Enterprise.

“Agistambayka pay bassit dita ta umaykami,” kinunana.

Rimmuar iti opisinana kalpasan nga imbilinna iti desk officer a tawagan ni Andy no agsubli iti estasion.

Agur-urayen ni Melvin iti patrol car. Limmugan.

“Papananta, bossing?” dinamag ni Melvin.

“Iti M & M Enterprise,” kinunana. “Awan pay ti lead ken ni Boy Kimat manipud kadagiti legmantayo?”

“Awan pay, Bossing. Uray ni Lily, kasla nagpukaw nga asuk.”

“Saan a mabalin nga agpukawda lattan,” kinuna ni Jessie. “Uray kasano a kinaannadda, addanto latta trail a mapanawanda. Ngem siguraduek, no sadino ti yan ni Lily, dita ti pakasarakan ken ni Boy Kimat.”

Ipapaigid pay laeng ni Melvin ti lugan, immasidegen ni Dionnie.

“Siguradoakon a ni Lily ti pagpatpatayan ni Corpuz iti Hot Stuff, bossing,” kinuna ni Dionnie. “Manipud iti mapagpiaran a gayyemtayo, inyalaan ni Corpuz ni Lily iti apartment. Kabarbaro nga apartment a naipatakder iti Barangay Paratong.”

Nagkinnita da Jessie ken ni Melvin.

[ Adda tuloyna ]